Paamiut Qimaasut imissaqartinnerisigut nussortoqarnera unitsinneqassasoq
Kommuneqarfik Sermersuumi sanarfinermut avatangiisinullu ataatsimiititap kommunip pilersaarutaanut tapiliussaq, Paamiuni inuussutissarsiornikkut suliniummut angisoorsuarmut aqqutissiuussisussaq, ataasinngormat akuersissutigaa.
Naaralaartitsiviulli nuunneqarnissaata Imarsiornermut aqutsisoqarfimmit akuerineqarnissaa piumasaqaatigineqarpoq.
Suliniutip annersaa tassaavoq suliffeqarfiup Koldcop Paamiuni imermik maqiteraluni avammut tunisassiorfimmik pilersitsinissaa, imerlu taanna Naalagaaffiit Peqatigiit qimaasunut najugaqarfiliaanut Afrikamilu nunanut peqqinnissamut ulorianaatilimmik imeqarfiusunut tuniniarneqassaaq.
Sanarfinermullu avatangiisinullu ataatsimiititap suliniutissaq isumalluarfigilluaraa, ataatsimiititami siulittaasoq Inuit Ataqatigiinneersoq Malene Lynge taama oqaluttuarpoq.
AAMMA ATUARUK Imermik tunisassiornissamik suliniut Paamiuni aallartisarneqalersoq
- Suliniutigineqartoq pingaaruteqarluinnartutut isigaarput, suliffinnik avammullu nioqquteqarnermik pilersitsissammat. Aamma siunertaa pitsaalluinnarpoq, imermi qimaasut najugaqarfiinut nassiussuunneqassammat, Malene Lynge taama oqarpoq.
Paamiuni innuttaasut 1985-imiilli ikiliartuinnarsimapput. Paamiuni innuttaasut ukiut 32-t matuma siornamut naleqqiullugit ukioq manna 986-inik ikinnerupput.
Ukioq Innuttaasut
1985 2433
1995 2056
2005 1817
2015 1496
2017 1447
Tigusiffik: Naatsorsueqqissaartarfik
Imermik suliniutaasup saniatigut Frederikshåb Betoncetral umiarsualiviup avannarlersaani sumiiffimmut allamut nuunneqartussaavoq, aamma nutaamik aqquserngiortoqassaaq qamutinik assakaasulinnik oqimaatsunik illoqarfiup iluatigut angallanneq killilersimaarniarlugu.
Suliniullu tamaat isigalugu umiarsualiviup avannarlersaani suliffissuaqarneq umiarsualiveqarnerlu marloriaatinngungajallugu annertusarneqassaaq.
Frederikshåb Betoncentralip suliniutissamut siunnersuusiortuusup pisortaa Martin Sandy Shalmi naapertorlugu, sanaartornerup nalaani suliffiit 30-t missaanniittut pilersinneqassapput suliniullu naammassineqarpat imermillu maqiteraluni tunisassiorneq aallartippat suliffiit 30-t 60-illu akornanni pilersinneqassallutik.
AAMMA ATUARUK Imermik tuniniaanermik ingerlatsivik atornerlunniarsimagaluaraat
Tamatuma saniatigut illoqarfimmi suliffeqarfinnut allanut pitsaasumik aamma sunniuteqassaaq, taakku tunisaqarnerulersinnaassammata imaluunniit suliffinnik nutaanik pilersitsillutik.
Paamiunilu ineriartorneq ilorraap tungaanut saatissallugu pisariaqarpoq, suliffiit aalaakkaasut amigaatigineqarnerat pissutigalugu innuttaasut 80-ikkunili ikiliartuinnarsimammata, Malene Lynge taama oqarpoq.
- Suliffissaaleqinermut millisaataanissaa Paamiullu illoqarfiani siuariartornermik pilersitsisinnaanissaa neriuutigaarput, Malene Lynge taama oqarpoq.
AAMMA ATUARUK Nunanut allanut niuerneq siuariartortoq
Frederikshåb Betoncentralip qaartiterinerit siulliit oktobarimi novembarimilu aallartissinnaassallugit neriuutigaa, sanaartornerullu aasaru aallartissinnaanissaa aamma neriuutigalugu.
Suliniutilli inaarutaasumik akuersissutigineqannginnerani Imarsiornermik aqutsisoqarfimmit, Aningaasaqarnermut ataatsimiititamit naggataatigullu Kommunalbestyrelsimit akuerineqarnissaa pisariaqarpoq.
AAMMA ATUARUK Nipitsat suaat Paamiuni suliffissaqarfitsipput
