Nipitsat suaat Paamiuni suliffissaqarfitsipput
Nipitsat suaat Paamiunut tunitsivimmut tunineqagaata, taakku imermi tarajulimmi salinneqariarlutik poortorneqariarlutillu tunisassiarineqartarneri siorna misiliutitut aallartinneqarpoq.
Tamannalu Paamiuni suliassaqartitsilluartoq, Royal Greenlandip nittartagaani atuarneqarsinnaavoq.
- Nipitsat suaannik qerisunik tunisassiorneq siornamut naleqqiullugu suliassaqartitsilluarpoq, tassa maanna sulisut siornamut naleqqiullugit marloriaammik amerlanerusut sulisorineqarmata, Paamiuni tunisassiortfiup ingerlatsisua, Ilannguaq Abrahamsen oqarpoq.
Aamma atuaruk Nipisat suaannik tunisineq ammalersoq
Nipitsat suaannik Paamiuni tunisassiorneq aprilip quliganni aallartimmalli suaat qerisut 27 tonsit maannamut tunisassiarineqareerput. Tamannalu suliffinnik 20-nik pilersitsisoq, Ilannguaq Abrahamsen Royal Greenlandip nittartagaanut oqarpoq.
Paamiuni Royal Greenlandip tunisassiorfiani saattuat qalerallillu aamma tunisaapput. Kingusinnerusukkullu saarullinniarneq aallartippat, saarulliit nerpii tunisassiarineqalerpata maannamut sulisuusut 70-it ilaneqarlutik 90-nngornissaat naatsorsuutigineqarpoq.
