Imermik tunisassiornissamik suliniut Paamiuni aallartisarneqalersoq
Suliniuteqartoq tassaavoq KoldCo Greenland Aps canadamiunit pigineqartoq, piginneqatigiiffillu Naalagaaffiit Peqatigiit qimaasunut ineqarfiinut imermik Paamiuneersumik nassuiassalerusuppoq.
Piginneqatigiiffiup ajunngitsuliornermik suliniaqatigiiffik On Guard for Humanity suleqatigaa, suliniaqatigiiffik taanna qimaasunut ineqarfiit pilersornissaannik isumaginnittuuvoq.
Suliniutinili allanisulli suliniut qanoq aningaasalersorneqassanersoq suli apeqqutaavoq. KoldCo Greenlandili, Sermitsiaq naapertorlugu, imermik tunisassiornissamut kisermaassillunilu avammut nioqquteqarnissamut akuersissummik ukiuni 30-ni atuuttussamik tunineqarsimavoq.
Imermik tunisassiornissamik suliniut Kommuneqarfik Sermersuumi maannakkorpiaq oktobarip 28-ata tungaanut tusarniaassutigineqarpoq. Suliniutaasoq ataatsimiititaliani assigiinngitsuni oqaluuserineqassaaq.
Kommunalbestyrelsip januaarimi akuersissuteqarnissaa neriuutigineqarpoq, tamatuma kingorna illorsuarmik tunisassiorfissamik maqiterivissamillu sanaartorneq aallartinneqarsinnaassalluni.
Imermik Paamiuneersumik 2018-imi februaarip qaammataani siullerpaamik nassiussisoqarsinnaanera naatsorsuutigineqartoq, Sermitsiaq taama allappoq.
