Tuluk takornariaq: Kalaallit Nunaat ukiorpassuarni takorusullugu, takugakku nuanneq

Umiarsuarsuaq takornarianik angallassisut Crown Princess takornarianik 2962-inik ilaasoqarluni ullumi Nuummiimmat Nuup illoqarfia takornarianik ujameriattuinnaavoq.

Takornariarpassuit ilagaat Tuluit Nunaanneersoq Rosalyn Thompson,

"Nuummiinneerput nuannareqaarput aamma qiiananngilanga", Rosalyn Thompson oqarpoq. Eqqaassutissiat takuavut, oqaluffiit pulaarpavut, taakkualu ilaat oqaluffik mikisoq Apostuulit oqaluffiat pulaarparput qaaqquneqaratta tassanilu palasimit oqaluttuunneqarpugut.

Nalunaaquttap akunnerata affaa atorlugu Nuup illoqarfiani bussinut ilaalluta ingerlaarpugut, nuannisaqaagullu Rosalyn oqarpoq.

Umiarsuaq takornarianik angallassisoq Crown Princess Tuluit Nunaannit Savalimmiut Islandilu aqqusaareerlugit ullumi Nuummiippoq. Unnugu aallaruni aqagu Nanortalimmut aqqusaassapput, New Foundlandimut New Yourkimullu ingerlaqqissallutik

Takornariarpassuit Nuup saavani Katersugaasiviup eqqaatigut ikaartaatit angallatigalugit umiarsuarmut umiarsuarmiillu Nuummut ikaassorneqarput. Sanalukkanik tuniniaasoq Bolethe Rothberg naapipparput tunisaqarluarporlu, annerusumik sapaangaaqqanik ujaqqanillu pinnersaasiat takornarianit pisiarerusunneqartartut, Bolethe Rothberg oqarpoq.

Bolethe Rothberg neriukkaluarpoq kaammattuillunilu sanaluttartut amerlanerusut tuniniaasassasut.