Tuluit nunaatigisimasaat namminneq isumaqatigiissuteqarniarput
Australiamiunullumi apeqqut taannarpiaq ilungersunartuuvoq, allaat silap pissusaata allanngoriartornera pissutigalugu nunarsuarmi siullersaallutik innuttaasunik taasititsisariaqalersinnaallutik.
Tuluit nunasiaatigisimasaani kattuffissuaq Commonwealth-imi taaneqartup ilaasortaasa ilaannut, tassa Australiamut ataatsimeersuarnissaq pingaaruteqarpoq, tassami Australiap premierministeriata Kevin Rodd-ip nammineq nunaminni silap pissusaanut tunngassutilinnik annertuumik anguniagaqarpalaartumik Senatimut saqqummiussaralua illuatugiliuttunik itigartinneqarsimavoq, tamatumalu kingunerisaanik silap pissussaanut tunngassutilimmik Australiap siunissami politikkeqalernissi innuttaminut taasissutigisariaqalersinnaassallugu. Taamaaliortoqassappallu premierministeriusup siunnersuutaa innuttaasunit akuersissutigineqassasoq isumasiuinerit takutippaat.
Naak Commonwealthimi ilaasortat ataatsimiittarnerat isornartorsiuisunit asuli oqallittarfittut taakkartorneqartaraluartoq Tuluit nunaata premierministeriata Australiallu premierministeriata ataatsimeersuarnissami angusaqarfiulluarnissartik neriuutigaat, isumaqatigiissutigisimasatimmi Københavnimi ataatsimeersuarialerunik ataatsimoorlutik saqqummiussinnaanisammassuk.
Trinidad-imi ataatsimeersuarnissami Danmarkip ministeriunera Lars Løkke Rasmussen FN-illu generalsekretæria Ban Ki-Moon oqalugiartunut ilaassapput.
