Tuluit Nunaat Norgelu russit aqqartartunik malersuinissamut isumaqatigiissusiortut

Isumaqatigiissutip nutaap kingunerisaanik tuluit norskillu sakkutuuisa imarsiortut russit ilaatigut nunatta eqqaani suliaqarnerannik nakkutigisussanngorpaat.

Allattoq Ritzau

decembarip 06-at 2025 11:54

Nutserisoq Connie Fontain

Tuluit Nunaata Norgellu illersornissamut isumaqatigiissutaanni "russit aqqartartut Atlantikup Avannarpasissuani" malersornissaat siunertaavoq.

Nunani taakkunani marlunni siulittaasut sisamanngornermi paasissutissiipput.

Isumaqatigiissut immap iluani attaveqaasersuutinik pingaaruteqartunik – ilaatigut kabelinik illersuutaassasoq oqaatigineqarpoq. Atlantikup avannarpasissuani immap iluani attaveqaasersuutinut aserorterneqarsimassangatinneqartut ukiuni kingullerni tusarsaavoq.

Norskit ministeriunerata, Jonas Gahr Størep tuluit ministeriuneq, Keir Starmer Londonimi sisamanngornermi ataatsimeeqatigaa.

Uanilu Johas Gahr Størep "isumaqatigiissut pingaaruteqarluinnarnerarpaa".

- Maannakkut pissutsinut tunngassuteqarpoq. Europap sumi inisisimaneranik siunissamilu sillimaniarnermut atatillugu iliuuserineqartariaqartunik nassuerutiginninnermut tunngassuteqarpoq, norskit ministeriunerat oqarpoq.

Tuluit norskillu sakkutuui imarsiortut isumaqatigiissuteqarnerup kingunerisaanik russit sakkutuuisa imarsiortut Kalaallit Nunaata, Islandip Tuluit Nunaatalu qanittuani imartani suliaqarnerannik nakkutilliilissapput.

Nunani tamalaani sillimaniarnermut illersuineq

Uanilu "immap iluani kabelit aamma sullullit attaveqaqatigiinnermut, innaallagissamut gassimullu pingaaruteqartunut atorneqartut illersorneqarnissaat" siunertaasoq, tuluit illersornissamut ministereqarfiat oqaaseqaammi oqarpoq.

Isumaqatigiissut tuluit fregattiliaannik 13-inik Tuluit Nunaata Norgellu tulleriaarlutik aquttagassaannik ilaqarpoq.

- Nunarsuarmi piffissami allanngorartoqarfiulluinnartumi tassa russit umiarsuisa imartatsinni nalunaarsorneqartut amerligaluttuinnarneranni nunani tamalaani suleqatigisatsinnik isumaqatigiissuteqarluta nunatsinnik sillimaniarnermut illersuisariaqarpugut, ministeriuneq, Keir Starmer oqarpoq.

Ruslandip Ukrainemik saassussinerata malitsigisaanik Rusland assigiinngitsutigut sorsulereersutut nunat killiinit politikerinit arlalinnit siusinnerusukkut pasillerneqarpoq.

Aserorterineq qarasaasiatigullu saassussineq ilaatigut aqqutigalugit assigiinngitsutigut sorsunneq nunat iligiit akornanni avissaartuutsitsilernissamik siunertaqarnerarneqarpoq.

/ritzau/AFP

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.