Tuluit Nunaat EU-mut ilaasortaajunnaassappat Nunatsinnut sunniuteqarsinnaasoq
Nunanut nunasiaataasimasunut EU-mut niueqateqartunut, OLT-mik taagorneqartunut Nunarput ilaavoq, tamannalu pissutigalugu killilersugaanngitsumik nunanut EU-mut ilaasortanut, soorlu Tuluit Nunaannut, niueqateqasinnaalluni.
Royal Greenlandip ukiumoortumik nalunaarusiaani, Tuluit Nunaat pillugu imatut allaqqasoqarpoq.
- Tuluit Nunaat Skandinavialu raajanik uutanik qalipaajakkanillu tunisaqarfiulluartarput. Tunisassiarineqartut pisiariumaneqartunit ikinneroqaat, tamannalu akiisa qaffariarujussuarnerannik kinguneqarpoq, ukiumoortumik nalunaarusiami allaqqavoq.
Aamma atuaruk Tuluit EU pillugu taaseqataanissamut allatsissimasut aatsaat taama amerlatigisut
Tassani aamma allaqqavoq, Europa niuerfinni pingaarnerpaajusoq, kaaviiaartitatigut 56 procentinik isertitaqarfiusarmat.
Taama isumaqatigiittoqarnera pissutigalugu nioqqutit Nunatsinneersut EU-mut tunineqaraangata akitsuuserneqarneq ajorput, aammalu isumaqatigiissut 2012-imeersoq pissutigalugu Nunarput EU-p nerisassianik nakutilliinikkut aaqqissuussineranut ilaavoq, taamaammallu nerisassianik nakkutilliinermut immikkut aningaasartuuteqartariaqarnani.
Tuluit Nunaallu EU-mit ilaasortaajunnaassappat, Nunarput Tuluit Nunaannut taama pitsaatigisumik niuiinnarsinnaanersoq nalunarpoq.
Tassalu KNR-ip tusarfii naapertorlugit nunatta Tuluit Nunaanntu tuniniaanissamut periarfissaannut Tuluit EU-mit anernerminnut atatillugu qanoq ittumik isumaqatigiissusiorsinnaanerat apeqqutaassaaq, soorluttaaq nunatta tulunnik EU avaqqullugu qanoq itumik isumaqatigiissusiorsinnaanerat apeqquitaassasoq.
Aamma atuaruk Clinton: Tuluit Nunaat EU-mut ilaasortaaginnartariaqarpoq
Tuluit Nunaata EU-llu ilaasortaajunnaarnissamut isumaqatiginninniarnissaat sivisusinnaasoq, ilisimasallit ilimagaat.
Nunarput EU-p siulianit, EF-imit ukiuni pingasuni isumaqatigiinniarsareerluni 1985-imi ilaasortaajunnaarpoq.
Danmark Tuluuit Nunaannut ukiumut 70 milliardit koruuninngajannut tunisisarpoq. Tuluit Nunaallu EU-mut ilaasortaajunnaassagaluarpat, danskit 13.000-it suliffimminnit soraarsitaasariaqarsinnaasut Arbejderbevægelsens Erhvervsrådip nalilerpaa.
Tuluit Nunaat EU-mut ilaasortaajunnaassagaluarpat, Nunatsinnut qanoq kinguneqarsinnaanersoq, Naalakkersuisut sisamanngornermi oqaaseqarumanngillat, Tuluit Nunaanni taasititsineq sunnerumannginnamikku.
