Tuluit EU pillugu taaseqataanissamut allatsissimasut aatsaat taama amerlatigisut
Tuluit katillugit 46,5 millionit sisamanngornermi juunip 23-ani taaseqataaniarlutik allatsissimapput, Tuluit Nunaanni qinersinermut ataatsimiititaliarsuaq nutaarsiassaqartitsivik AFP naapertorlugu taama ilisimatitsivoq.
- Tuluit Nunaanni Gibraltarimilu qinersisartut maannamuugallartoq 46.499.537-t allatsissimapput, tamannalu rekordiliineruvoq, qinersinermut ataatsimiititaliarsuaq ippassaq marlunngornermi taama nalunaaruteqarpoq.
Kingullermik rekordiliisoqarmat tuluit inatsisartuinut qinersinermi tamanna pivoq, taamani 46.354.197-it qinersiartormata.
Taasititsinissamut nalunaarnissaq juunip arfineq-aappaanut killeqarpoq, inuppassuilli piffissaq kingulleq atorlugu nalunaariartormata qarasaasiatigullu atortorissaarutit angummassinnaajunnaarmata killiussaq ullunik marlunnik sivitsorneqarpoq.
Juunip arfineq-aappaani allatsittunit 525.000-iusunit 132.000-it 25-t inorlugit ukioqarput. Assersuussissagaannilu, allatsittut 13.000-it missaat 65-it 74-illu akornanni ukioqarput.
Qinersisartunik isumasiuinerit takutippaat qinersisartut inuusunnerusut EU-miiginnarumallutik taasissasut, utoqqaanerusullu EU-mit aninissamik taasissasut.
Inuusuttut aamma taasinngitsoornerusarput, taamaammat inuusuttut taasiartortut amerlanerunerat EU-miiginnarnissamik suliniuteqartunut iluaqutaarartarsinnaavoq.