Tuluit 15 millionit akiuussuserneqarsimanissaannik anguniagaq iluatsikkiartortoq

Tuluit Nunaanni inuit 12 millioninit ikinnerunngitsut coronavirusimut maanna akiuussuserneqarsimapput.

Tuluit naalakkersuisuisa kisitsisaataasa sapaammi saqqummiunneqartut tamanna takutippaa.

Innuttaasut sanngiinnerusut, 70-it sinnerlugit ukiullit, napparsimmavinni sulisut inuillu pigiuakkamik nappaateqartut 15 millionit februaarip ulluisa 15-iat sioqqullugu akiuussuserneqarsimanissaannik tuluit naalakkersuisuisa anguniagaat taamaasilluni iluatsikkiartulerpoq.

Anguniakkat naammassineqalersutut isikkoqartut tuluit peqqinnissaqarfiata nalunaarutigaa.

AAMMA ATUARUK Tuluit naalagaaffeqatigiiffianni tunillanneqarsimasutut siumorneqartut siullerpaamik 60.000-t sinneraat

Tuluit Nunaanni innuttaasut 50-isileereersut maajiutinnagu akiuussuserneqarsimanissaat kingorna taava anguniagaavoq.

Tuluit Nunaanni coronavirusimik tunillanneqarsimasutut ullormut siumorneqartartut agguaqatigiissillugu siorna decembarimi ullormut 70.000-t sinnertarpaat.

Tuluit Nunaanni inuit 100.000-ugaangata 218-it ulluni kingullerni arfineq-marlunni tunillanneqarsimasutut siumorneqartartut nalunaarsorneqarsimavoq.

Coronavirus siorna tuniluutilermalli Tuluit Nunaanni tunillanneqarsimasut 4 millioningajaapput, 112.000-llu missaat nappaat toqqutigisimallugu.