Tuluit naalagaaffeqatigiiffianni tunillanneqarsimasutut siumorneqartut siullerpaamik 60.000-t sinneraat

Tuluit naalagaaffeqatigiiffianni coronavirusimik nalunaaquttap akunneri 24-t kingulliit ingerlaneranni tunillanneqarsimasutut marlunngornermi siumorneqartut katillutik 60.916-iupput. Nalunaaquttap akunneri 24-t ingerlaneranni tunillanneqarsimasut taamaasillutik siullerpaamik 60.000-it sinnerpaat.

Ullormut nalunaarsuinerit tamanna takutippaa.

Coronavirusip tuniluutilertornera tuluit naalagaaffeqatigiiffianni peqqinnissaqarfiup ernumanarluinnartutut nalilerpaa, napparsimmaviimmi artukkerneqareeqisut artukkerneqarnerulersinnaammata.

Nappaammik tuluit naalagaaffeqatigiiffianni ataasinngornermit marlunngornermut toqquteqartut 830-upput, ullup siulianut naleqqiullugu marloriaammik amerlanerullutik.

AAMMA ATUARUK Boris Johnsonip Tuluit Nunaata sukannersumik matuneqarnissaa piumasarigaa

Tuluit Nunaanni inuit 1 millionit sinnerlugit coronavirusimik maana tunillanneqarsimasut, tuluit naalagaaffeqatigiiffianni ministeriuneq Boris Johnson tusagassiortunik katersortitsinermi oqarpoq. 

Tassa imaappoq, Tuluit Nunaanni innuttaasut 2 procentii coronavirusumik maanna nappaateqarput.

Nappaat siorna tuniluutilermalli tuluit naalagaaffeqatigiiffianni inuit katillugit 2,75 millionit coronavirusimik tunillanneqarsimapput.

Tuluit naalagaaffeqatigiiffianni inuit 1,3 millionit coronavirusimut akiuussutissamik kapineqarsimasut taakkunanngalu Tuluit Nunaanni 1,1 millionit kapineqarsimasut, Boris Johnsonip ilanngullugu oqaatigaa.