Tuluit ministeriat: Timersorneq ammaqqinniarniarparput

Tuluit Nunaat coronavirusimik eqqorneqangaatsiarpoq, assersuutigaluguli isikkamik arsaalluni Premier Leaguemi unammiuaarnerit piffissami qaninnermi aallarteqqeriaannaapput.

Timersornerup ammaanneqaqqinnissaa pingaarutilittut isigineqartoq, tuluit nunanut allanut tunngasunut ministeriata Dominic Raabip tusagassiortunik marlunngornermi katersortitsinermi oqaatigaa.

- Nunap ammaqqikkiartuaarneqarnerata immikkoortuata aappaani timersornerit isiginnaartoqaratik nanginneqarsinnaanissaat kultureqarnermut ministereqarfiup sulissutigaa, Dominic Raab oqarpoq.

- Innuttaasut qiimanerulissasut isumaqarpunga. Inuit suleqqilerusupput, meeqqallu atuariartoqqissinnaanissaat kissaatigineqarpoq, timersornerlu aamma pingaaruteqartinneqarluni.

- Tamannali isumannaatsumik illersorneqarsinnaasumillu aatsaat pisinnaanissaa soorunami pingaaruteqarpoq, innuttaasut peqqissusaat salliutillugu, Dominic Raab oqarpoq.

AAMMA ATUARUK Premier League udskudt på ubestemt tid - spillere skal ned i løn

Premier Leaguemi klubbit unammisarnitik pilersaarutit naapertorlugit juunip ulluisa aqqaneq-aappaanni aallarteqqikkusukkaat, Premier Leaguemi klubbit kingullermik nalunaarutigaat.

Unamminerit katillugit 92-iupput, ukiumi unammiuaarfiusumi unammeqattaarnerit 38-upput, unamminerillu 29-t maannamut naammassineqarsimallutik.

Unamminerit kingulliit naammassineqarnissaannut arsaattarfiit arlaannaannulluunniit illersuisuunngitsunit atorneqassasut BBC-p allaaseraa, soorlu aamma arsaattartut, klubbillu atorfilittaasa coronavirusimut misissorneqarnissaannut misissuinernik 40.000-nik pisariaqartitsisoqassasoq.

Premier Leaguemi kingullermik marsip ulluisa qulingiluaanni unammisoqarpoq.