Premier Leaguemi arsaanneq maajip aallartisimalaarnerani aallarteqqinnavianngilaq

Tuluit Nunaanni Premier Leaguemi arsaanneq maajip aallartisimalaarnerani aallarteqqinnavianngilaq. Premier Leaguep nittartagaani tamanna atuarneqarsinnaavoq.

Premier Leaguemi unamminerit apriilip ulluisa 30-ata tungaanut marsip qaammataani unitsikkallarneqarput. Klubbilli Premier Leaguemi ataatsimeeqatigineqareersullu unitsitsigallarneq suli piffissaligaanngitsumik ippassaq tallimanngornermi sivitsoqqinneqarpoq.

Premier Leaguemi unamminernik unitsitsigallarnerup sivitsorneqarnerata saniatigut, tuluit naalakkersuisuinit peqqinnissaqarfimmiillu tamakkiisumik aatsaat tapersersuisoqarneratigut Premier Leaguep aallarteqqinneqarsinnaanissaa isumaqatigiissutaavoq.

Unamminerit kinguartinneqarnerisa sivitsorneqarnerisa saniatigut arsaattartut akissarsiaasa 30 procentinik appartinneqarallarnissaat sulissutiginiarlugu, klubbit assigiinngitsut taassuma saniatigut isumaqatigiissutigaat.

Arsaattartut akissarsiaasa appartinneqarallarnissaat, tuluit peqqissutsimut ministeriata Matt Hancockip sisamanngormat kimigiiissutigaa.

- Innuttaasut tamarmik ikioqataasariaqarput, aamma Premier Leaguemi arsaattartut, peqqissutsimut ministeri Matt Hancock oqarpoq.

- Ikiueqataaniarussi akissarsiasi appartilaarniarsigit, Hancock oqarpoq.

Akissarsiat appartinneqarallarlutilluunniit akissarsiat kingusinnerusukkut aatsaat tunniunneqarsinnaanissaat, taakkualuunniit akuleriissillugit isumaqatigiissusiortoqarsinnaanissaa siunniunneqarpoq.

Arsaattartulli oqaloqatigineqaqqaassapput, Tuluit Nunaannilu arsaattartut kattuffia PFA klubbit sinniisuinik Premier Leaguellu sinniisaannik ullumi arfininngornermi ataatsimeeqateqassaaq, siunnersuut tassani pingaarnertut eqqartorneqassalluni.