Tuberkulose-rtut katsorsarneqartarnerat pillugu saqqummersitsineq
Katersugaasiviup illutaasa ilaat tassaapput Julemærkesanatoriap illutatoqaasa ilaat. Tassanilu kalaallit meerartaat 100-ut missaanniittut 19652-ip 59-illu akornanni katsorsartissimapput.
Katersugaasiviup ningiua Inger-Marie Børgesen saqqummersitsinissamut piareersarluni misissueqqissaarsimavoq, ilaatigut kalaallit arlallit meeraallutik katsorsaavimmi uninngasimasut apersorsimavai; nakorsat allattuivii atuarsimavai, nakorsallu meeqqat ilaqutaannut Kalaallit Nunaanniittunut allagarisarsimasaat atuarsimallugit. Katsorsaanermillu ersersinneqartut aallaavigalugit meeqqat kalaallit 22-it Eksperimentimut, misiliinermi peqataasut, misigisaannit allaaneroqisut paasinarpoq, Inger-Marie Børgesen oqarpoq.
- Meeqqat peqqissinissaat katsorsaanermi anguniarneqarsimavoq, soorunami meeqqat timaat nukittorsarneqarsimavoq sakialluutaallu katsorsarneqarluni, tarnikkulli misigisaat aamma pingaartinneqarsimapput, ilaquttatik ilaginagit ungasissorsuarmi katsorsarneqarnerat pillugu, Inger-Marie Børgesen oqarpoq.
Taamaattumik meeqqat Kalaallit Nunaannut atanerat annertuumik katsorsaasunit atatinniarneqarsimavoq, uffa ilai ukiorpassuarni katsorsaavimmi uninngagaluartut. Ilaatigut kalaallisut atuartinneqartarsimapput ilaannilu kalaaliminertugassaqartarsimallutik.
- Vejlep kangerluani ilaanni niisarnartoqarsimavoq, neqaanik mattaanillu katsorsaaviup pissarsinissaa nakorsaanerup isumagisimavaa, meeqqat mamartugassaqarniassammata, Inger-Marie Børgesen oqaluttuarpoq.
Taamaakkaluartoq angajoqqaanut maqaasineq Kalaallit Nunaannullu angerlarserneq annertusimaqaaq.
- Angerlarsimaffimminniit ungasissorujussuarmiipput, ilaquttaminniillu pulaarneqassanatik, ilaallu ilaquttaminnut maaniinnermi nalaani attaveqanngivillutik. Taamalu angerlarsimaffimmit ungasitsigimiilluni artornarsimassaqaaq. Nukappiaraq ataaseq ataasileeqqammerluni unitsinneqarpoq aatsaallu katsorsaavik matummat angerlartinneqarluni, tassalu arfineq-marluleereernikuulluni angerlartinneqarluni, Inger-Marie Børgesen oqarpoq.
Inger-Marie Børgesen-ip meeqqat Kalaallit Nunaannut angerlarnerat qanoq issimanersoq aamma misissorsimavaa. Meeqqat katsorsarneqarsimasut amerlasuut oqaluttuarput sakiallunneq oqaluuserineqaqqusaaneq ajorsimasoq. Ingammillu nukappiaqqat angerlamut ulluinnarmullu uternertik artornanaarsimavaat, Inger-Marie Børgesen oqarpoq.
