Tuberkoluusertut marloriaammik amerlisimasut

Kalaallit Danmarkimi najugallit tuberkulosemik tunillatsissimasut amerlassusaat 2008-p kingorna marloriaat sinnerlugu amerlassuseqalersimapput. 2010-milu kalaallit 65-it tuberkulosemik tunillatsissimasut paasineqarpoq. Taamaariarmat innuttaasut tuberkulosemik tunillatsinnissamut navianartorsiortut misissorumallugit Aalborgip napparsimmavissuata pualluttunik katsorsaaviata qaaqqusimavai.

- Tamaani kalaalerpassuaqartoq nalunngilarput, taakku ilaquttatik ikinngutitillu Kalaallit Nunaaniittut attaveqarfigilluartuuaat. Kalaallit Nunaanni tuberkulosertut amerliartortut nalunngeriaratsigu kalaallit tamaani najugallit misissorneqartussanut akulerutsippagut.

Pualluttut katsorsartarfianni nakorsaaneq Ulla Møller Weinreich taama oqaluttuarpoq. Neqeroorullumi asuliinnaasimanngilaq, tassami kalaallit Aalborgimiittut 200-nik ikinnerunngitsut misissortikkiartorsimapput.

- Misissortikkiartortut ilimagisatsinnit amerlanerusimaqaat. Misissorumallutigimmi aggersarsimasatta 90 procentii ulloq manna tikillugu takkussuutereersimapput, nakorsaaneq oqarpoq nangillunilu:

- Ulloq manna tikillugu tuberkulosertoq ataasiinnaq nassaarivarput, sinnerilu ajoquteqarsimanatik. Allat sukumiinerusumik misissugassanngortissimavagut, allanilli tassa nassaarsimanata.

Tuberkulosersorigaannilu makku maluginiagassaapput:
- Unnuakkut kiakkertarneq, quersorulunneq, sanigorneq kiisalu kissarneqarneq. Tassa tamakku atugarinerlugit eqqumaffiginiagassaapput. Ulla Møller Weinreich oqarpoq.

Danmarkimi tuberkulosertut 28 procentii kalaaliupput. Tassa procentinngorlugu Danmarkimi kalaallit tunillatsissimasut Kalaallit Nunaani innuttaasunit tunillatsikulanerupput. Tunillatsissimasut akunnerminni attaveqatigiinnerat pissutaavoq, tunillatsissimasullu sisamararterutaat angerlarsimaffeqanngitsuupput aanngajaarniutinilluunniit atuinerluttuullutik.