Trumpip qinersisoqarnissaa kinguarteqqugaa
USA-mi præsidentimut qinersinissap isumannaallisaaneq eqqarsaatigalugu kinguartinneqarsinnaanissaa, maanna præsidentip Donald Trumpip Twitterikkut allagaqarnermigut eqqarsaatersuutigaa.
Nutaarsiassaqartitsivik Ritzau sisamanngornermi taama allaaserisaqarpoq.
Allakkatigut taasisoqarnerani peqquserluttuliortoqaratarsinnaanera Trumpip inuit attaveqaqatigiittarfiatigut Twitterikkut oqaatigaa:
- Qinersinissaq inuit iluamik, tutsuiginartumik isumannaatsumillu qinersisinnaalernissaannut kinguartinneqarli, Trump ilaatigut oqarpoq.
AAMMA ATUARUK Covid-19-imik USA-mi tunillanneqarsimasut aatsaat taama amerlatigisut
Allakkatigut taasisoqarnerani peqquserluttuliortoqartarnerata qasseerpassuariarluni oqaatigisarsimallugu, Trumpip allakkamini uteqqippaa:
- Ukioq 2020-mi allakkatigut qinersinerup oqaluttuarisaanermi aatsaat taama eqqunngitsigisumik inerneqarlunilu peqquserluttuliorfiutigissaaq. USA-p avataanit isigineqarneranik innarliissaaq, Trump Twitterikkut ilaatigut taama allaaserisaqarpoq.
Præsidentimut qinersineq USA-mi kinguartinneqassanersoq USA-mi præsidentip aalajangersinnaanngilaa, USA-mili inatsisartut kongresimiittut taamaallaat taamaaliorsinnaallutik. Ritzau taama allaaserisaqarpoq.
Innuttaasut sinnerlugit sinniisoqarfimmi, tassa Repræsentanternes Husimi, tamanna ilaatigut aalajangerneqassaaq, demokratillu tassani amerlanerussuteqarlutik.
Demokratit sinnerlugit USA-mi kongresimi ilaasortaq Dan Kildee qisuariaateqarpoq:
AAMMA ATUARUK Joe Biden præsidentinngorniunnissamut sassartussanngorpasilertoq
- Maanna præsidentiusoq salluliorpoq, suli pissaaneqarniaannarnini pillugu qinersinissap kinguartinneqarnissaa sukataarutigalugu, Dan Kildee, USA-mi demokratineersoq, Twitterikkut oqarpoq.
Coronap ajornartoortitsinera pissutaalluni inuit qinersiartorsinnaassanersut USA-mi oqallisaaleruttorpoq. Allakkatigut taasisoqarsinnaanissaa tamanna pillugu periarfissaanerussanersoq ilaatigut siunnersuutaalluni.