USA-p præsidentiata Donald Trumpip tusagassiortunik ataasinngornermi unnukkut katersortitsinermini Kalaallit Nunaata tiguarnissaanik kissaateqarnini uteqqippaa.

Tusagassiortunik katersortitsinermi USA-p Israelillu Iranimut sorsunnerat sammineqartussaagaluarpoq.

Oqalugiaatip naggataani Trumpip Nato USA-mik ikiuinnginnerarlugu isornartorsiorpaa.

Mark Rutte, Donald Trumpimut pingasunngorpat tikeraartussaq, "inutsialattut" eqqartoqqaarpaa.

Trumpilli oqarnera naapertorlugu Nato qallikkut nukittuneraraluarluni piviusorsiortumik sanngiitsuullunilu sunniuteqarsinnaanngilaq.

Taava Kalaallit Nunaat eqqartulerpaa.

- Ilumoortoq tusarusukkussiuk, taava Kalaallit Nunaat aallarnerfigalugu suna tamarmi aallartippoq. Kalaallit Nunaat perusupparput. Taakku tunniunnianngilaat, taava inuulluaqqusivunga ("bye-bye"), Trump tusagassiortunik katersortitsinermit qimagutinnginnermini naggasiivoq.

Taamaalilluni præsidentip tusarliussani itisilinngilaa.

Sioorasaarineq iluatsitsinngitsoornerusoq

USA-p Israelillu Iran ukioq manna februaarip naanerani saassuppaat, Trumpillu USA-p Europami iligisai tamatuma kingorna ikiortissarsiorfigai.

Nunat Europameersut Natomut ilaasortat Hormusip kangerluata ammatinneqartuarnissaanut ikiuutinngippata Natomut ajortisaarissasut taanna oqarpoq.

Europamiulli, Nato sorsugiartitsinngitsuunera pissutigalugu Trumpillu taassumaluunniit naalakkersuisuisa sorsunnerup suna siunertarineraa erseqqissumik oqaatiginngimmassuk, maannamut naaggaarput Natolu pilersaarusiornermut peqataatinnagu.

Trumpili Kalaallit Nunannut ukiorpassuarni soqutiginnippoq. Kalaallit Nunaannik aqutsilerusunnini arlaleriarluni oqaatigeqqeqattaarpaa. 

Folketingimut ilaasortanngorlaaq Naaja H. Nathanielsen (IA) inoqatinut attaveqaatini ataasinngornermi ima allappoq: 

- Piffissami inuuffiusumi inuiattut inuunerput, piorsarsimassuseq nunatullu nammineersinnaassuseqarnerput ajoraluartumik naqissuseqattaartariaqarparput. Uagut ingerlavitsinnik aqutsivugut. Pissaanilissuit oqaluuserisartakkaminni oqaatsit itsaq atorneqartut ukiuni makkunani ilaarpaat. Inuiaqatigiinni tamani taamaaliortoqalersimavoq, ingasattajaarnerusut kisimik piunnaarlutik. 

- Tamanna nipangersimaannarfigineqarnani akerlilerneqartariaqarpoq. Kalaallit Nunaanni tamat oqartussaaqataanerat atuuppoq. Nunat tamalaat inatsisaat akueraagut. Maanna atukkagut siunissarpullu nunanit allanit aalajangiiffigineqassanngilaq. Pissaaneqarneruniarluni sioorasaarineq ajugaanerunngilaq. Tamanna iluatsitsinngitsoornermut nalunaarutaavoq, Naaja H. Nathanielsen oqarpoq.

Taassumap Trumpip oqaasii toqqaannartumik innersuussutiginngilai.