Trump Washington D.C.-imi isumannaallisaanerusoqarnissaanut akuersisoq
Joe Bidenip præsidentitut januaarip ulluisa 20-anni ivertinneqarnissaanut atatillugu Washington D.C.-mi isumannaallisanerit ullut sisamat tallimalluunniit sioqqullugu annertusarneqassapput.
Præsident Donald Trumpip tamanna atasinngornermi akuersissutigigaa, nutaarsiassaqartitsivik Reuters allappoq.
USA-mi inatsisartut kongressimi ataatsimiittarfiata sapaatip-akunnerata siuliani saassunneqarnerisa kingorna immikkut ittumik isumannaallisaaniartoqarpoq, Bidenimmi ivertinneqarnissaanut ullualunnguit sioqqullugu ullormilu ivertitsivimmi akerliussutsimik takutitsiniartut sakkulersorsinnaanissaat, USA-p naalagaaffiata politiivisa FBI-meersut mianersoqqussutigaat.
Sakkulersorniat immikkoortut arfininngorpat Washington D.C.-liarnissamik pilersaaruteqartut FBI-mit nakkutigineqartut, oqaaseqaammi, tv-qarfiup ABC Newsip pissarsiarisimasaani, takuneqarsinnaavoq.
AAMMA ATUARUK Joe Bidenip ajugaanera Kongressip uppernarsarpaa
Præsident Donald Trump præsidentitut uppitinniarneqassappat USA-mi naalagaaffinni 50-ini tamani sakkortuumik akerliuniarnertik sakkulersorniat mianersoqqussutigaat.
Joe Bidenip præsidentitut ivertinneqarnerata ulluani naalagaaffiup eqqartuussiviillu naalagaaffinni 50-ini illutaasa saassunneqarnissaannut aamma kajumissaaruteqarput.
Nutaarsiassaqartitsiviup Reutersip ABC Newsip paasissutissaatai uppernarsarniarsarigaluarpai iluatsissimanaguli.
Naalaagaaffiit ataasiakkaat sakkutuui Nationalgardimik taaneqartartut 15.000-it Washington D.C.-liartineqarnissaat pilersaarutigineqartoq ippassaq ataasinngornermi nalunaarutigineqarpoq.