Trump qinersinermi naligiikannerfiusartumi pingaaruteqartumi Floridami ajugaasoq
Qinersinermi naligiiffiukannertartumi naligiiffiusartutut Florida taagorneqartarpoq. Tassa qinersinerup unnuani naalagaaffimmi tassani republikanerinik taasisoqarsinnaallunilu demokraatinik taasisoqarsinnaasarpoq.
Naalagaaffinni aalajangersimasumik taasissussat katillutik 538-upput.
Taakkua USA-p naalagaaffiini 50-ini agguataaqqapput.
Naalagaaffiit tamarmik immikkut aalajangersimasumik amerlassusilinnik taasissussaqartarput, taamaammat naalagaaffiit amerlanerpaanik taasisussallit pingaaruteqartupilussuusinnaapput.
Præsidentip illorsuani allaffeqalersinnaajumalluni taasisussanit amerlanerussuteqartunit tassa 270-init taaneqarsimasariaqarpoq.
Taamaammat præsidentinngorniuttuni taaguunneqarnerpaaq toqqaannaartumik præsidentinngortitaasanngilaq.
Qinersinerup unnuani matumani Donald Trump qinigaanerpaavoq: Naalagaaffimmi naalaaffimmut ilaasumi ajugaavoq, taamaalillunilu taasisinnaasut 29-t pissarsiaralugit.
Taamaalilluni inernerit maanna – kalaallit nalunaaqutaat 02.39 malillugu imaalerput – Trump 174-inik taasisussaqalerpoq Bidenilu 223-nik taasisussaqarluni.
Republikanerit ukiuni kingullerni Floridami siuarialaaqqapput. Floridalu Donald Trumpip New Yorkimit ukiaq 2019-imi nuunneranit angerlarsimaffiatut aamma isigineqalerpoq.
AAMMA ATUARUK ATAATSIMUT ISIGALUGU: Biden suli siuttuuvoq - Trumpili qinersinermi naligiiffiusartuni pingaaruteqartuni ajugaasoq
Qinersiviusut allat naligiiffiusartut tassaapput Arizona, Georgia, Michigan, Minnesota, Nevada, New Hampshire, North Carolina, Pennsylvania aamma Wisconsin.
Qinersiviusumit naligiiffiukannertartumit Michiganimit, 16-init taasisussaqarfiusussamit inaarutaasumik inernerit taakku nalunaaqutaat malillugu pingasunngornermi unnukkut aatsaat piariissangatinneqarput. Tamanna Michiganip nunamut imminermut ministerianut issuaasup, Washington Postip allaaserigaa
Qinersivinnit naligiiffiukannertartunit pingaaruteqartunit Pennsylvaniamit Wisconsinimiillu inernerit aamma ullualunnik sivisussuseqarsinnaapput, allakkatigummi taasinernik naatsorsuinerit piffissamik atuiffiunissaat naatsorsuutigineqarmat.
Pennsylvaniami taasisussat 20-upput Wisconsinimiillu qulit.