Trump pissaanermik atornerluisimanersoq ataatsimiititaliap misissuiffigniiaraa

Paasissutissat peqquserluttuliorsimanermut, pissaanermik atornerluinermut, eqqartuussiviullu sulineranik akornusersuinermik Trumpip qasseerpassuariarluni pasineqarneranut tunngasut tunniunneqarnissaat siunertaavoq.

USA-mi naalagaaffiup politiivini FBI-mi pisortaasimasup James Comeyp Trumpimit soraarsitaanera pillugu paasissutissat taakkununnga ilaapput. Russit USA-mi præsidentimut qinersisoqarneranut akuliussimanerannik Trumpip ilisimasaqarsimanera Comeyp Trumpimut ilaatigut pasilliutigaa.

- Trumpip eqqartuussiviup sulineranik akornusersuisimanera qularutissaanngilaq, inatsiseqarnermut ataatsimiititaliap siulittaasua Jerrold Nadler, Demokratineersoq, oqarpoq, Trumpillu naalakkersuinermut tunngasunut eqqartuussivimmut sassartinneqarsinnaanissaanut, tassuunatigut tunuartinneqarnissaanut, tunngasunut misissuisoqarsinnaasoq oqaatigalugu.

Trumpip eqqartuussissuserisorisimasaa Michael Cohen, præsidentimut sakkortuunik sapaatip-akunnerata siuliani pasilliuteqareersorlu misissuisoqarnissaa ataatsimiititaliap kissaatigilerpaa. Cohenip Trump sallutuutut, peqquserluttuliortutut ammillu qalipaataannik assigiinngisitsiniartutut tassani taavaa.