Trump præsidentiunnaarnerminut atatillugu oqalugiarnermini: Uteqqissaagut
Qanorluunniit uteqqikkumaarluni tamannalu qanittukkut piumaartoq, præsident Donald Trump USA-mi naalagaaffimmi Marylandimi Joint Airbase Andrewsimi præsidentiujunnaarnerminut atatillugu oqalugiarami oqarpoq.
- Ukiut sisamat kingulliit nuannersorsuupput, Trump oqarpoq.
- Tapersersuilluaqaasi, præsidentiuffigalusi nuannerluinnarpoq, Trump sulisunut, tapersersuisuminut ilaquttaminullu oqalugiarnerani najuuttunut oqarpoq.
- Suleqatigiilluta angusavut amerlaqaat. Ilissi pillusi sapinngisara tamaat anguniagaqartuassaanga, præsidentiujunnaartoq oqarpoq.
- Asavatsigit. Qanorluunniit uteqqissaagut. Inuulluarisi. Takoqqiliivippugut, Trump ingerlannginnermini naggasiivoq.
AAMMA ATUARUK Bidenip USA silap pissusia pillugu isumaqatigiissummut WHO-mullu ilannguteqqilertorusukkaa
Trumpip kingoraatissani Joe Biden oqalugiarnermini eqqaanngilaa, naalakkersuisunngortulli ajunnginnerpaamik kissaappai.
Trump oqalugiareerami nulianilu Melania Trump præsidentip timmisartorsuanut ilaallutik aallarput.
Trumpip Floridami Mar-a-Lagomut golfertarfiutaanukarput. Tassunga, Biden USA-mi præsidentitut Washington D.C-mi danskit nalunaaqutaat naapertorlugu unnugu arfinermut uppernarsaatinneqarnerani, pilersaarutit malillugit tikissapput.
Amerikami præsidentiujunnaartumik præsidentinngortussamik ivertitsinermi peqataanngitsoortoqareernikuuvoq, tamannalu kingullermik ukiut 150-it sinnerlugit matuma siorna pivoq.