Trump republikanerillu Repræsentanternes Husimi amerlanerussuteqaqqilerusuttut
USA-p præsidenterisimasaata, Donald Trumpip, republikanerit innuttaasut sinnerlugit sinniisoqarfimmi, tassa Repræsentanternes Husimi siulittaasoq Kevin McCarthy Floridami sisamanngornermi ataatsimeeqatigaa.
Republikanerit partiiata siunissaa tassani ilaatigut oqaluuserineqarpoq.
Republikanerit Repræsentanternes Husimi 2022-mi qinersinissami qanoq amerlanerussuteqaqqilersinnaanersut ataatsimiinnermi pingaarnertut oqaluuserineqarpoq.
Trump taama nalunaarpoq.
- Præsidentiusimasoq republikanerit sinnerlugit Repræsentanternes Husimut Senatimullu qinikkanik 2022-mi qinersinissamut ikiuunnissaminut sisamanngornermi imminut pisussaafilerpoq, Kevin McCarthy oqarpoq.
AAMMA ATUARUK Trump præsidentiunnaarnerminut atatillugu oqalugiarnermini: Uteqqissaagut
USA-mi præsidentiusimasut "Mr.President"-imik ulluinnarni taaneqartarput. Aamma præsidentiujunnaarsimagaluarunilluunniit.
USA-mi demokratit Trumpip naalakkersuinermut akisussaasumut eqqartuunneqarnissaanik aallartitsinerat McCarthyp taassuma saniatigut isornartorsiorpaa.
Joe Biden USA-mi præsidentitut ivertinneqarmalli, Trump Floridami Palm Beachimut tunuarsimaariartorpoq tassanilu najugaqalerluni.
Trump republikanerit partiiata saniatigut qinigassamik allamik pilersitsiniarnersoq eqqarsaatersuutigineqarsimavoq.
Trumpilli McCarthyllu sisamanngornermi nalunaarutaat aallaavigalugu Trumpip partiimik nutaamik pilersitsiniarnera ilimanarpallaarunnaartutut nalilerneqarpoq.