Taasisinnaasut Bidenimut toqqaassappata Trump aniniarluni neriorsuisoq
USA-p præsidentiata Donald Trumpip qinersinermi ajorsarnini aatsaat taama nassuerutigeqqajaatigigini, sisamanngornermi danskit nalunaaqutaat malillugu kingusissukkut nalunaarutigaa.
Nutaarsiassaqartitsiviit Reuters AFP-ilu taama allapput.
Trumpip, præsidentip illorsua qimassallugu, Demokratineersoq Joe Biden ajugaasoq ilumut uppernarsarneqarpat oqarpoq.
AAMMA ATUARUK Joe Biden 80 millioninit ikinnerunngitsunit taaguunneqartoq
- Taamaaliussaanga. Aamma illit nalunngilat, Trump tusagassiortoq apeqqutigisaata ilaanut akissutaa, AFP naapertorlugu taama nipeqarpoq.
Trumpilu qinersinermi ajorsarnerminut akuersiartorneranik takutitsisuusoq, nittartakkatigut nutaarsiassaqartitsivimmi Kongressen.com-imi aaqqissuisup, Anders Agnesip nalilerpaa.
- Allanimmi periarfissaqanngilaq, qinersinerummi inerneri allaanerusinnaanngillat, taanna oqarpoq.
Præsidentimik oqaatigineqarsimasut allat sinneri eqqarsaatigalugit nalunaarutaalu pingaaruteqartut, aaqqissuisoq isumaqarpoq.
Assersuutigalugu præsidenti, Joe Bidenip ajugaanera naqissuserneqarpat kukkunerussasoq oqarpoq. Arlaannillu sapaatit akunnerini tulliuttuni pisoqarumaartoq aamma oqaatigaa. Sunarpiarli pinerlugu oqanngilaq, oqaatigisarpassuili uppernarsaatissaqanngillat
AAMMA ATUARUK Donald Trumpip taasinernik kisitsineq unitsikkusukkaa
- Qinersinermi pissusissamik unioqqutitsisoqarsimasoqarsorigamiuk qinersinerup inerneranik nassuerutiginninnissani ajornangaatsiassasoq aamma oqaatigaa, Anders Agner.
Demokraatineersoq Joe Biden pilersaarut malillugu januaarip ulluisa 20-anni ivertinneqassaaq. Tamanna præsidentiusimasup nalinginnaasumik najuunneratigut ingerlanneqartarpoq, Trumpilli ileqqoq malillugu peqataanissaa nalunarpoq.
