Trumpip nappaatit tuniluussinnaasut pillugit USA-mi immikkut ilisimasalik atorsinnaanngitsuuneraraa

Nappaatit tuniluussinnaasut pillugit USA-mi immikkut ilisimasalik Anthony Fauci atorsinnaanngitsutut, USA-p præsidentianit Donald Trumpimit taaneqarpoq, aamma inuit coronavirus nappaallu Covid-19 tusakatappaat.

USA-p præsidentia Donald Trump taama isumaqarpoq, isummanilu qineqqusaarnermini sulisuminut sianernermini annillugit. Oqaloqatigiinnerat tusagassiortut arlallit tusarnaaraat, aviisi The New York Times allappoq.

- Inuit covid qatsuppaat, Trump taama oqartoq aviisi allappoq.

- Qinersisartunik aatsaat taama amerlatigisunik tusarnaartoqarlunga qineqqusaarpunga. Covidilu akornatsinniippoq. Inuilli oqartarput ima: "Soqutaanngilaq. Akornusersorunnaarniartigut". Inuit qatsuppaat, præsidenti oqarpoq.

AAMMA ATUARUK Anthony Fauci: USA-mi coronamik tunillatsissimasut ullormut 100.000-nik amerlisalerataannaasut

Nappaatit tuniluussinnaasut pillugit ilisimasalik, Anthony Fauci, coronavirusip tuniluutilertornerani tutsuiginartutut USA-mi innuttaasut akornanni amerlanerussuteqartunit nalilerneqartarpoq.

USA-mi inuit 200.000-nit amerlanerusut covid-19-imik toqquteqarnissaat taassuma qaammatit arlallit matuma siorna siulittuutigaa.

Taannali - Trump sioqqullugu præsidentinut allanut siunnersortaasarsimasoq - Trumpip tusagassiortunik katersuutsitsisarneranut peqataasarunnaartitaasimalluni.

Fauci Trumpip oqaasiinut akerliulluni arlaleriarluni oqaaseqartareersorlu, tusagassiortunik katersuutsitsinernut peqataasarunnaartoq alaatsinaattut arlallit maluginiarsimavaat.

- Inuk taanna atorsinnaanngilaq, Trump qineqqusaarnerminut atatillugu allattoqarfimmi sulisuminik oqaloqateqarnermini ilaatigut oqarpoq.