Trump Erdoganilu Washingtonimi naapittussanngortut
USA-p præsidentia, Donald Trump, Tyrkiallu præsidentia, Recep Tayyip Erdogan, Washingtonimi novembarip ulluisa 13-ianni naapikkumallutik isumaqatigiipput.
Marluullutik ippassaq pingasunngormat oqarasuaatikkut oqaloqatigiinnerminni taama aalajangerput.
Naapinnissaat sivisujaartumik pilersaarutaavoq, Erdoganilli naapinnissartik ilumut piviusunngussanersoq sapaatit-akunnerani matumani qularinerarpaa.
AAMMA ATUARUK Ajorluinnartumik sianiilliussanngilatit
Amerikami inatsisartuni ilaasortarpaaluit Tyrkiamut sakkortuunik iliuuseqartoqaqqinnissaanik piumasaqarsimanerat ilaatigut pissutaavoq.
Donald Trumpip Tyrkiap præsidentia Washingtonimut tikilluaqqujumaarlugu Twitterikkut nalunaarutigaa.
Donald Trumpip ilaatigut allappaa, marluullutik Syriami pisut, peqqarniisaarniarnermut akiuineq kurderinullu saassussinerit pillugit oqaloqatigiissallutik.