Trump Erdoganimut: Ajorluinnartumik sianiilliussanngilatit
- Ajorluinnartumik sianiilliussanngilatit.
Donald Trump Tyrkiap præsidentianut, Recep Tayyip Erdoganimut, mianersoqquteqarluni allakkamini taama naggasiivoq.
Allakkat oktobarip qulluisa qulingiluaanni tassa Tyrkiap sakkutuui Syriap avannaata kangiani annertuumik saassussillutik aallartiffianni nassiussaapput.
Nutaarsiassaqartitsiviit ilaatigut CNN aamma Reuters taama allaaserisaqarput.
Amerikap præsidentiata Tyrkiap præsidentia, Recep Tayyip Erdogan, massakkut pisut aallaavigalugit assuarineqartorujussuanngorneranik inuttullu ajorluinnartutut isigineqalerneranik kinguneqarsinnaanerarlugu toqqarluinnarlugu mianersoqquaa.
Nutaarsiassaqartitsiviup AFP-ip allakkat oqaasipilunnik imaqarmata allaaserisamini immikkuullarissuunerarpai.
- Inunnik tuusintilikkuutaanik toqoraanermut akisussaatitaarusunngilatit. Uangalu Tyrkiap aningaasaqarneranut ajutoortitsinissamut akisussaarusunngilanga - taamaaliussaangalu, Trump allakkamini taama allappoq.
Trumpip erseqqissumik nassuiaateqarani tiguaanermi ingasattajaartoqannginnissaa erseqqissaatigeqqippaa.
- Pisoq pillugu ajunngitsumik inuppalaartumillu aaqqiissuteqarfigigukku inupalaatut isigineqalernavianngilatit, præsidenti taama allappoq.
Donald Trumpip allakkamini allappoq, Ergodan Syriami demokratiimik aallussisut tassa De Syriske Demokratiske Styrker (SDF) isumaqatiginninniaqatigigaluarpagit pitsammik isumaqatigiissusiortoqarsinnaasoq.
Kurderimiu Mazloum Abdi, PKK-mut tassa kurderinut sakkutuutut pissusilertortartunut atassuteqartuunera pissutigalugu Tyrkiamiunit peqqarniisaarniatut isigineqartoq SDF-ikkut aqutsisoraat.
Erdoganili sakkulersorunnaartoqarnissaanut pilersaartunut peqataanissaminnut marlunngormat itigartitsivoq.
/ritzau/
