Trumpip præsidentimut sassartinneqarnissaa suli nalorninartoq
![](/sites/default/files/styles/image_934x467/public/article_images/20221109-095318-l-3500x2329ma.jpg?itok=Ic4rTZrm)
Qaammaterpaalunni isumaliutigineqartarsimavoq, maannalu uppernarsineqarluni: USA-mi præsidentiusimasoq, Donald Trump, republikanerit sinnerlugit præsidentimut 2024-mi qinersisoqarnissaanut sassarniarluni aalajangerpoq.
Trumpili republikanerini siornatigornit pissaanikinneruvoq, republikanerillu sinnerlugit præsidentimut 2024-mi sassartinneqarnissaa suli nalorninarluni.
Anders Agner, nittartakkakkut nutaarsiassaqartitsivimmi Kongresssen.dk-mi aaqqissuisuuneq taama oqarpoq.
AAMMA ATUARUK Georgiamit senatimut ilaasortanngortussamik decembarimi qinerseqqittoqassasoq
Pingaartumik ataaseq Donald Trumpimut unammillertaalluarsinnaasutut nalilerneqarpoq.
Tassaavoq naalagaaffimmi Floridami guvernøri, Ron DeSantis, qinersinermi naammassineqaqqammersumi amerlanerussuteqarluartunit taaguunneqarluni guvernøritut qinigaaqqittoq.
Republikanerit præsidentinngorniunnissamut sassartitassaattut taanna suli nalunaarutiginninngilaq.
- Trumpimut ajugaanissamik periarfissagissaarnerusut akornanniippoq. Republikanerit præsidentimut sassartitassaattut Trumpimut unammillertaalluarsinnaasut akornanniilluinnarpoq, Anders Agner oqarpoq.