Georgiamit senatimut ilaasortanngortussamik decembarimi qinerseqqittoqassasoq
USA-mi naalagaaffimmi Georgiamit senatimut ilaasortanngortussamik decembarip ulluisa arferngaanni qinerseqqittoqassasoq, Georgiami ministeriuneq Brad Raffensberger erseqqissaavoq.
- Republikanerineersoq Herschel Walker demokratineersorlu Raphael Warnock qinersisinnaasut 50 procentiannit amerlanerusunilluunniit taaguunneqarsimanngillat.
Tamanna qinigaanissamut piumasaqaataavoq. Herschel Walker qinersisartut 48,5 procentiannit Raphal Warnockilu 49,4 procentiannit qinerneqarpoq.
Senatimi kikkut amerlanerussuteqartut kingusinnerusukkut paasinarsissaaq.
AAMMA ATUARUK Demokratit USA-mi inatsisartunut qinersinermi ilimagisamit angusarissaanerusut
Naak qinersiviup qiterpaarnerani qinersineq partiimut konservatiiviusumut republikanerinut ilimagineqartutuut angusarissaarfiunngikkaluartoq, republikanerit USA-mi inatsisartut marluk, tassa innuttaasut sinnerlugit sinniisoqarfimmi Repræsentanternes Husimi senatimiluunniit amerlanerussuteqalernissaatut isikkoqarpoq.Partii sorleq ukiuni tulliuttuni marlunni qinersivimmi aqutsisuussanersoq qinersinerup massuma takutikkumaarpaa.
Assersuutigalugumi republikanerit amerlanerussuteqalissappata, demokratit sinnerlugit præsidentip Joe Bidenip inatsissatut siunnersuutinik ukiuni tulliuttuni marlunni saqqummiisarnissamini siunnersuutit akuersissutigineqarnissaat ajornarkusoorsinnaassaaq.