True North Gems: Politikkikkut isumapiloqarluta atorfinitsitsinngilagut
Suliffeqarfiup pisortaata Bent Olsvig Jensenip oqaatigaa ajuusaarnartuusoq, politikkikkut qinngasaarunnerit ingasattajaarunneqaleraangata taava nunamut pingaarutillit apeqqutit isiginiarneqarunnaartartut.
Atorfinitsitsineq politikkimut attuumassuteqarnerarlugu oqaluttut taassuma ilumuunnginnerarpai.
- Isumaqartoqarpat politikkikkut isumapiloqartugut oqaatigiinnassavara, taamaattoqarsimasuuppat suliatsinnut tunngasuni politikkikkut sunniuteqarluarsinnaanerpaamik atorfinitsitsisimassagaluaratta, taanna erseqqissaavoq. Tamatumunngalu atatillugu isumaqarpunga Jens B. Frederiksen politiitut sulisimanini pissutigalugu annertuumik ilisimasaqalersimasoq suliassatsinnullu attuumassuteqartunik piginnaaneqalersimasoq.
Bent Olsvig Jensenip erseqqissarpaa isumannaallisaaneq aligunik aappaluttunik piiaavissami pingaaruteqarnerpaat ilagigaat.
Nunarsuarmi piumasaqaatit naammassinissannut taamatullu Namminersorlutitk Oqartussat nakkutilliinerannut atatillugu ataqatigiissumik aaqqissuussinerit, suleriaatsit sulisullu naammassisinnaajumallugit atortut taamatullu ujaqqat erlinnartut piiaanerup tunisassiornerullu nalaani nassuiartarnissaat pisariaqarput.
- Suliassat nunat allamiut isumannaallisaanermut suliffeqarfiutaannut imissutigisinnaagaluarpavut, aalajangerpugulli nammineq suliffiliorniarluta, sulisuvullu nammineq ilinniartillugit. Sulisussat taakku nassaarinissaat aqunnissaallu pillugit ilaatigut Jens B. Frederiksen atorfinitsipparput, Bent Olsvig Jensen oqarpoq.
Tamatumunnga atatillugu taassuma erseqqissarpaa, Jens B. Frederiksen politikkimik suliaqarnermik misilittagaqarnermigut aningaasaliisunut takutikkaa, sullivinni sulinissaminut misilittagaqarluartoq taamatullu qaffasissumik akisussaassuseqarluni aqutsisinnaasoq. Aamma takutereeraa nunarsuarmi sumiluunniit akuusinnaalluni tamannalu kalaallit ujaraataasa erlinnartut nunarsuup sinneranut akigissaartillugit tunineqartassappata pingaarluinnartuusoq, True North Gemsip pisortaanerata erseqqissarpaa.
Jens B. Frederiksen ulluni kingullerni suliffittaani pillugu isornartorsiorneqarnerminut atatillugu Radiuaviisimut ippassaq oqarpoq, Demokraatini siulittaasutut Inatsisartunilu ilaasortatut ingerlaannassalluni, taamaattorli apeqqutinut aligunik aappaluttunik tunisassiorfimmut tunngasunut suliamut qanippallaartutut nalunaaruteqartassalluni.
