Tritonip aalisartut ikiorniarpai
Issittumi Sakkutooqarfiup umiarsuaa alapernaarsuut, Triton Sisimunut aallartineqarpoq, taamaani aalisariutit sikkussaaqqasut aalisaqqilernissaat siunertaralugu.
Allattoq Apollo Jeremiassen
Sisimiut eqqaa tamarmi suli sikooqaaq, taamaattumillu aalisartut angallataat amerlasuut sikkussaaqqallutik. Aalisartulli sakkutuut umiarsuaanit, Tritonimit maanna ikiorneqartussanngorput. Tassa umiarsuaq Triton aqagumiit sikumik aserorterilissagami.
Tamanna Sisimiuni aalisartunut ikiorsiinerusoq, Tritonimi naalakkap oqaatigaa. Taanna aamma oqarpoq, Tritonip sikumik aserorterinerani aalisariutit malinnaasut tamanna aalisariutit namminneq akisussaaffigissagamikku.