Triatlonertartoq nunatsinneersoq Ironmanip affaani VM-ertussanngorpoq
Malik Lynge Reidingip anngunera pivoq Thailandimi Phuketimi Ironman ingerlanneqarmat. Inuttaatalu angusani tupaallaatigeqalugu Thailandimiit oqaluttuaraa.
- Nammineq piginnaasakka najoqqutaralugit ullugissaarsimavunga taamalu peqataasunit 800-nit normu 56-iullunga apuuppunga. Naak suli pitsaanerusinnaagaluartoq angusaq naammagisimaarpara.
Iromanip affaanut unamminermi 1,9 kilometerimut naluttoqartarpoq, 90 kilometerimut sikkilertoqarluni kiisalu 21,1 kilometerimut arpattoqartarluni. Taamatut unamminermini Malik Lynge Reidingip atorpai akunnerit sisamat minutsit 49-ut sekundillu 53-it.
Inuttaata anguniagarinngikkaluarpaa Ironmanip affaanut VM-imut anngunnissani tassami Ironmanimut ilivitsumut 2012 Hawaii-imi pisussamut anngunnissani siunertarigamiuk.
- Anngunnerali nuannaarutigeqaara tassami naatsorsuutigisimanngikkaluarakku, taama oqarpoq.
Ulluinnarni Malik Lynge Reiding neriniartarfinnguamik Danmarkimi Samsømi ingerlatsisuuvoq.
- Ulluinnarni triatlonertartuuallaarnanga igasuuneruvunga. Kisiannili taakku tamaasa ingerlassinnaavakka Royal Greenland aningaasaliisorigakku, taama oqarpoq.
Aappaagu novemberip qaammataani Malik Lynge Reiding Ironmanimut ilivitsumut unammeqataassaaq Mexicomi tassanilu VM-imut anngussinnaanissani neriuutigaa.