Nuuk Inuit pingasut ujajaaniarsimasutut pasineqartut tigummigallagaapput
Aappariit, arnaq 40-t sinnerlugit ukiulik, angullu 40-t inorlugit ukiulik, angullu allat suli 30-liineqanngitsoq, tigummigallagaanissaat, unnerluussisussaatitaasup Eqqartuussisoqarfik Sermersuumi sassartitsisoqarnerani piumasaraa.
Allattoq Mads Lynge
marsip 16-at 2018 17:20
Taakku Nuup ilaani Nuussuarmi ukioq manna marsip ulluisa aqqaneq-aappaanni sakkortuumik ujajaaniarsimasutut pasineqarput.
Aappariit inuusuttut ujajaasoqarnerani sakkortuumik nakuuserfigineqarput, arnarlu inuusuttoq ajoqusingaatsiarluni. Arnaq Nuummi napparsimmavissuarmi passunneqareernermi kingorna angerlartinneqarpoq. Angut inuusuttoq ujajaasoqarnerani annerusumik ajoqusersimanngitsoq, Nuummi politiit ilisimatitsissutigaat.
Ujajaanerup ikiaroornartumut hashimut tunngassuteqarsimasinnaanissaa aallaavigalugu politiit misissuileruttorput. Pasineqartut matoqqasumik killisiorneqarput, politiit suliamut atatillugu suli misissuinerat pissutaalluni tamanut matoqqasumik inatsit tunngaviusoq aallaavigalugu killisiuisoqarluni.
