Sisimiut qanittuanni nuna pingasoriarluni sajussimasoq
Sisimiuni nuna pingasoriarluni unnuaq sajussimasoq, Danmarkimi Kalaallit Nunaannilu Ujarassiuutut misissuiffiup GEUS-ip nalunaarutigaa, Sisimiunilu innuttaasut arlallit nunap sajunnera maluginiarsimallugu nalunaarutigigaat oqaatigalugu.
Sisimiunit avannamut 5 kilometerit missaannik ungasitsigisumi nuna pingasoriarluni sajuppoq, Richterip nunap sajuttarneranik uuttuutaa naapertorlugu 3,0-imik, 2,8-mik 2,5-imillu unnuaq nalunaaqutaq ataatsip qaangilarnerata ullaarlu arfernup qiteqqunnerata akornanni sajussimalluni.
AAMMA ATUARUK Nuna Kangaatsiap eqqaaniittoq sajuttoq
Nunap sajuttarneranik uuttuut sakkortussutsinut aqqaneq-marlunnut immikkoortoqarpoq, 12 sakkortunerpaalluni. Sisimiuni nunap sajunneri pingasut sakkukitsuinnaapput, lastbiilillu sanioqqunnerattut misiginarsinnaallutik.
Nunap sajunneranik misigisaqarsimasut GEUS-imut attaveqaqquneqarput.
1-imit 2-mut sakkortussusilik: Sakkukitsumik sajuttoq aseruatitertoqarnanilu. Inuit qaqutigut malugisinnaasarpaat.
3-mik sakkortussusilik: Suli sakkukippoq, kallertulli assingusumik sakkortutigivoq.
4-mik sakkortussusilik: Inunnit malugineqarsinnaavoq. Aseruatitertoqarsinnaavoq.
5-imik sakkortussusilik: Sajunnera malugineqarsinnaavoq. Pujoorfiit illullu qajannartut ajoqusissapput.
6-imik sakkortussusilik: Sajunnera aseruatitererujussuarsinnaavoq, illut nalinginnaasut ajoquserujussuassallutik.
7-imik sakkortussusilik: Sakkortuumik sajunneq, annertuumillu aseruatitertoqarluni.
8-mik sakkortussusilik: Sanaartukkat nunap sajunneranut isumannaakkat ajoqusingaatsiarsinnaapput.
9-mik sakkortussusilik: Sualuttumik aseruatitererujussuartumillu sajunneq.
Tusarfik: Illustreret Videnskab
- Nunammi assersuutigalugu Sisimiut nalaanni sajunnera pillugu ilisimatusarnermut pingaaruteqarpoq. Nunammi sumiiffinni ataasiakkaani sajunneranut atatillugu uuttortaatitta toqqaannartumik uuttortarsinnaanngilaat, GEUS tusagassiuutinut nalunaarummi allappoq.
GEUS uani attavigisinnaavat.
Nunap sajunnerani inunnik ajoqusertoqarsimaneranik illunilluunniit aseruatitertoqarsimaneranik nalunaartoqarsimanngitsoq, Kalaallit Nunaanni politiit KNR-imut ilisimatitsipput.
