Nuna Kangaatsiap eqqaaniittoq sajuttoq
Illoqarfeeqqap Kangaatsiap ungasinngisaani nuna sapaammi unnukkut arfininngulernerani sajuppoq.
Nuna richterskalamik uuttorlugu 3,4-mik sakkortutigaaq, tamannalu sakkortunerpaanngitsoq, GEUS-imit ilisimatooq Trine Dahl Jensen oqarpoq.
1-imit 2-mut sakkortussusilik: Sakkukitsumik sajuttoq aseruatitertoqarnanilu. Inuit qaqutigut malugisinnaasarpaat.
3-mik sakkortussusilik: Suli sakkukippoq, kallertulli assingusumik sakkortutigivoq.
4-mik sakkortussusilik: Inunnit malugineqarsinnaavoq. Aseruatitertoqarsinnaavoq.
5-imik sakkortussusilik: Sajunnera malugineqarsinnaavoq. Pujoorfiit illullu qajannartut ajoqusissapput.
6-imik sakkortussusilik: Sajunnera aseruatitererujussuarsinnaavoq, illut nalinginnaasut ajoquserujussuassallutik.
7-imik sakkortussusilik: Sakkortuumik sajunneq, annertuumillu aseruatitertoqarluni.
8-mik sakkortussusilik: Sanaartukkat nunap sajunneranut isumannaakkat ajoqusingaatsiarsinnaapput.
9-mik sakkortussusilik: Sualuttumik aseruatitererujussuartumillu sajunneq.
Tusarfik: Illustreret Videnskab
- Nunap sajunnera sakkortunerpaanngilaq, tassami nunap sajunneri sakkortunerit maani ukiup ingerlanerani takusareerpagut, Trine Dahl Jensen oqarpoq.
Taassuma nunap sajunnera sakkortunerpaajunngikkaluartoq, Kangaatsiami innuttaasut sajunneq malugisimassagaat ilimagalugu oqarpoq.
Nunali sivikitsuararsuarmik sajuppoq.
- Nunap sajunnerata aallartinneraniit sajukkunnaarnissaanut sekundinik 15-inik sivisutigivoq, Trine Dahl Jensen oqarpoq.
Nunap siornatigut sajunneri
Nuna tallimariarluni ukiuni kingullerni tallimani sajussimavoq.
- Nuna 2015-imi, 2016-imi, 2017-imi marsimilu ukioq manna sapaatiummallu sajuppoq, Trine Dahl Jensen oqarpoq.
- Nunap sajunneri taakku tallimat malugineqarsinnaaasuupput.
Tassalu nunap ukiuni kingullerni tallimani sajunneri amerlanerusinnaapput, kisianni Kangaatsiami sajunnermit sakkukinnerullutik.
Nunallu sajunnertarnerisa akulikinnerulernissaat aarlerinanngitsoq, taanna oqarpoq.
- Nunap taama sakkukitsigisumik sajuttarnera nalinginnaasuuvoq. Nunap akulikinnerusumik sajuttaleriasaarnissaa naatsorsuutigineqartariaqarsorinngilara, Trine Dahl Jensen oqarpoq.
