PITUFFIK Transparency: Siulittaasup sms-ii toqqorneqartalissapput
- Ministereqarfimmi naalakkersuisoqarfimmiluunnit attaveqatigiinneq ministereqarfimmi Naalakkersuisoqarfimmiluunniit allagaatitut allatulli pissarsiarineqarsinnaasariaqarput, imaassanngilaq inuit marluk pingaarutillit akornanni sulinngiffimminni oqaloqatigiinnerattut isigisariaqartoq, Thomas Trier Hansenip Pituffik pillugu nalunaaruisiaq misissoreerlugu taama oqarpoq.
Aamma atuaruk PITUFFIK Pituffik pillugu sulineq partiinit iluarineqanngilaq
Naalakkersuisut siulittaasorisimasaat Aleqa Hammond taassumalu naalakkersuisoqarfiani taamani pisortarisimasaa Svend Hardenberg sms-kkut arlaleriarlutik attaveqatigiittarsimasut, taassuma maluginiarsimavaa.
- Isumaqartoqarsinnaavoq attaveqatigiinerit tamarmik ministereqarfimmi aamma naalakkersuisoqarfimmi toqqorneqartartut naalakkersuisoqarfiullu allagaataannut ilaassasut, kisianni sms-kkut attaveqatigiinnerit qanoq inissisimassappat, Thomas Trier Hansen aperivoq.
- Namminersorluni Oqartussani suliunnaaraanni imaluunniit siulittaasuujunnaaraanni attaveqatigiissimanerit tamaasa toqqorneqarnissaanut malittarisassaqannginnerami?
Aamma atuaruk ATAATSIMUT ISIGALUGU Pituffimmi kiffartuussinissamik isumaqatigiissutip annaaneqarnera
SMS atorlugu attaveqatigiinneq
Naalakkersuisuni siulittaasuugaanni sms-it qanoq atorneqassanersut toqqorneqartassanersullu Namminersorlutik Oqartussani aalajangersimasumik malittarisassaqartariaqartoq, taanna isumaqarpoq.
Taamaliornikkummi suliani qanoq pisoqarsimanersoq aatsaat takuneqarsinnaassammat.
- Attaveqatigiinnerit Spiermannip pissarsiarisimasai tassaarpasipput, Spiermannimut tunniunneqarsimasut. Misissuiniaraanni taama aallaveqarnissaq soorunamui pitsaanerpaanngilaq. Tassami suliami misissukkami allagaatit nammineq nassaarineqarsinaasariqarput, imaanngitsoq sulisut ataasiakkaat misissuinermni ilaasut attaveqatigiissimanermi uppernarsaatinik, angerlarsimaffimminiitsitaannik, nassiussinissaannik qinnuigisariaqarlugit, Transparency International Greenlandimi immikkut ilisimasalittut ilaasortaq, eqqartuussiserisoq aamma Nunatsinni eqqartuusivimmi eqqartuusisuusimasoq Thomas Trier Hansen taama oqarpoq.
