Oqaluttuarisaanermi angutit arnanngornerit Tysklandimi inatsisartuni ilaasortanngortut

Tysklandimi inatsisartunut qinersisoqarnerani, angutinik arnanngornernik marlunnik inatsisartunut aatsaavissuaq qinersisoqarpoq, taakku avatangiisinik soqutigisaqartunit De Grønne partiimeersuupput.

Tamanna tyskit qinersereernerata kingorna paasinarsivoq.

Taakkuupput 44-nik ukiulik Tessa Ganserer aamma 27-inik ukiulik Nyke Slawik.

- Oqaluttuarisaanermi partii De Grønnemut aatsaat taama pisoqarpoq, taamatullu angutinut arnanngornikunut suiaqatinoortartunullu kiffaanngissusermik pilersitsivoq, Ganserer oqarpoq.

Taassuma ilaatigut suiaqatinoortut meerarsiartaarsinnaanissaanut inatsimmik allanngortitsisinnaanissaq anguniarpaa. Suiaassutsiminnillu allanngortitsinissaminnik qinnuteqartut ajornannginnerusumik akuerisaasalernissaat pitsanngorsarusuppaa.

Suiaqatinoortartunut qinngarinninnermut tunngasumik nunamut tamarmut pilersaarummik atuutilersitsinissaq, Nyke Slawikip, anguniagassaasa ilagaat. Assigiinngisitsinermullu inatsisit pitsanngorsarniarpai.

Tyskandimi 1969-ip tungaanut suiaqatinoortarneq inerteqqutaavoq. Suiaqatigiit katissinnaanerat 2017-imi atuutilerpoq.

Inunnut LGBT-tut tunuliaqutaqartunut qinngarinninnermut tunngatillugu, pinerlunnerit 36 procentimik siorna amerleriartut, Tysklandimi politiit nalunaarsuisarnerini takuneqarsinnaavoq.