Canada Arnat periarfeerunneqartut pillugit paasisat nikallunganartut
Inuit, indianerit métisillu arnartaat ilaquttatik toqutaasimanngikkunik periarfeerunneqarsimasut pillugit isumalioqatigiissitamut oqaluttuartarput.
Oqaluttuat taakku inaarutaasumik nalunaarusiassami, ukiaru naammassineqartussami, ilanngunneqassapput.
Nunap inoqqaavisa arnartaasa taama pineqartarneri qanoq pinngitsoortinneqarsinnaanersut, suliallu sukkasuumik sunniuteqarluartumillu qanoq naammassineqarsinnaanersut nalunaarusiassami ukkatarineqassasut, isumalioqatigiissitamut ilaasortat ilaat, kinaassutsiminik isertuusserusuttoq, kinaassusaali radioaviisimit ilisimaneqartoq, KNR-imut oqarpoq.
Quebecimi politiit sunniutikippallaarajuttarmata, provinsimi arnat eqqugaasimaqaat.
Montrealimi inuit arnat akilertillutik atortittartut arlallit "atorneqarsinnaajunnaaraangamik", tassalu atoqatigineqarusukkunnaaraangamik ittuminnit toqunneqarsimasut, tusarfik oqaluttuarpoq.
Arnat marluk imminut toqussimasutut isikkoqartillugit nivinngarneqarlutik toqutaasimasut, politiillu arnat imminut toqussimasoralugit pisuni taakkunani annerusumik misissuisimanngitsut, tusarfik aamma oqaluttuarpoq.
Taamaammat politiit sunniuteqarnerunissaat pillugu nalunaarusiassami inassuteqartoqarniarpoq.