Sulisitsisut inerteqqutit sivitsorneqarnerat pillugu: Ilungersunartorujussuuvoq
- Ilungersunarpoq. Ilungersunartorujussuuvoq, inupparujussuillu eqqugaassapput.
Sulisitsisut pisortaat, Brian Buus Pedersen nunatsinni killilersuinerit apriilip qaammataata naanissaanut atuuttut pillugit oqarpoq.
Pingaartumik timmisartukkut angallannerup uninnganera inuillu qulinit amerlanerusut katersuuteqqusaannginnerat pisiniarfinnut, neriniartarfinnut suliffeqarfinnullu allanut nunatsinniittunut eqquivoq.
Timmisartukkut angallanneq apriilip ulluisa arfineq-pingajuanni ammaqqittussaagaluarpoq, Naalakkersuisulli interteqqutit ullormut tassunga ulloq ataaseq sioqqullugu maajip aallaqqaataata tungaanut sivitsorpaat, tamatuma saniatigut katersuunnissamut inerteqquteqarneq nunatta sinneranut siammarneqarluni.
AAMMA ATUARUK Tamaat isigalugu: Nuummi killilersuisoqaannassasoq - sineriammili atuarfeqarfiit annikitsukkuutaartumik ammassasut
Tamanna suliffeqarfinnut ajornartorsiortunut ikiorsiissutissanut ilungersortitsingaatsiarpoq.
- Nunarput tamakkerlugu inuit qulinit amerlanerusut katersuutinnginnissaanut inerteqquteqarneq sivitsuinerlu suliffeqarfippaalunnut kiffartuussinermik ingerlataqartunut aningaasatigut ajornartorsiungaatsiartoqalernissaanik isumaqarpoq, naallu ikiorsiissutissaqaraluartoq annaasat tamakkiisut tassannga taarserneqarsinnaanngillat, Sulisitsisut pisortaat, Brian Buus Pedersen oqarpoq.
Sulisitsisut: Inuussutissarsiortunut ikiorsiissutit naammanngillat
Peqqissutsimut atatillugu iliuusissaq suna eqqortuunersoq Sulisitsisut eqqornianngilaa, inuussutissarsiornermullu atatillugu peqatigiiffittut ikiorsiissutit maannakkut piusut naammannginnerat ernummatigineqarpoq – pingaartumik killilersuinerit aasaq tungaanut atuukkiartulissappata.
- Piffissap sivitsornerani tamanna suliffeqarfitsinnut aasaanerani kaaviiaartitassaminnik annaasaqartussanut unammillernangaatsiassaaq, inuussutissarsiortunullu ikiorsiissutit maannakkutut itsillugit taakku suliassangaatsiamut kivitsinissamut naammanngillat, Sulisitsisunit, Brian Buus Pedersen oqarpoq.
AAMMA ATUARUK Nunatsinni inuussutissarsiornermut ikiorsiissutit ima ipput
Suliffeqarfiilli Nakorsaaneqarfimmit inuit aqqanillit tunillatsissimasut tamarmik peqqisseqqissimanerannik pingasunngornermi nalunaaruteqartunit ikiorserneqarsinnaapput. Tunillatsissimasut peqqisseqqissimanerat killilersuinerit poorskip kingorna sakkukillineqarsinnaaersut oqartussanit misissorneqartussanngornerannik isumaqarpoq. Oqartussat tassunga tunngatillugu apriilip ulluisa 13-ianni aalajangiissapput.
