Torben Koch: Isertitsiviit qimminulluunniit tulluutinngillat

Isertitsiviit nunatsinniittut ajorpallaarnerarlugit, Danmarkimi Politiit Kattuffiata eqqartuussisuserisuata Torben Kochip suliaq Folketingip Ombudsmandianut suliarisassanngortinniarpaa, folketingillu eqqartuussiveqarneq pillugu ataatsimiititaliaani oqaluuserisassanngortinniarlugu:

- Tasiilap isertitsiviani pissutsit atuuttut takullugit ajuusaarnaqaat. Aaqqiisoqarnissaalu siunertaralugu Folketingip Ombudsmandianut suliassanngortitsiniarpunga, Danmarkimi Politiit Kattuffianni eqqartuussisuserisoq Torben Koch oqarpoq.

Taanna suliaq allarluinnarmut tunngasoq pillugu ulluni makkunani nunatsinniippoq, tassami Tasiilami politeeqarfiup pisortaata Kristian Síngertâp suliffimminik sumiginnaasimasutut eqqartuunneqarnerani illersuiartorpoq.

Kristian Síngertât eqqartuussinermi pinngitsuutinneqarpoq.

Suliamut tassunga atatillugu Tasiilami isertitsivimmi pissutsit atuuttut qitiullunnarput. Kristian Síngertâp isersimatitanik nakkutilliisuutitaasussaavoq, suliaminillu sumiginnaasimasutut nunatta politimesterisimasaannit Anders Linnet-imit unnerluutigisassanngortinneqarpoq.

Eqqartuussinerup ingerlanerani Tasiilami isertitsivik alakkarneqarmat, pissutsit ajorneri Torben Koch-imit maluginiarneqarput:

- Tasiilami isertitsivik qimminulluunniit tulluutinngilaq. Silaannaluppoq, inuillu arlallit inimi ataatsimi isersimatinneqarput, pisariaqavipporlu pissutsit aaqqiivigineqarnissaat, Torben Koch naqissusiivoq.