Toqutsisutut pasisaq iperagaavoq
Qaammatini tallimani tigummigallarneqareerluni Hans Peter Petersen silaannaq ukiarpalaartoq Danmarkimi najuussoqqisissinnaannngorpaa. Maanna pasisaajunnaarluni iperagaavoq.
- Hans Peter Petersenip eqqartuussivimmut sassartinnissaa tunuartipparput. Uppernarsarsinnaanngilarput ilumut taannaanersoq Severine Møllerimik uummataatigut kapisisoq. Taamaammat iperangaavoq. Iperangaasup aallaqqaataaniit oqaatigiuarpaa pinngitsuulluni oqarluni Severine Møller kamassimaarnermini imminut savimmik kapisoq. Misissuinitta aamma takutippaa taama pisoqarsimagunartoq, Fynimi naalaagaaffiup eqqartuussisussaatitaa Claus Guldbrandsen KNR.gl-mut oqarpoq.
Suliap ingerlanerani toqusut timaannik misissuisartut aammalu nakorsat eqqartuussivinnik siunnersuisartut isumasiorneqartareersut Hans Peter Petersen iperagaavoq. Taamaammat ippassaq iperagaavoq unnerluussissutit tunuartinneqarmata.
- Severine Møller toqummat inuit marluk isersimaqataapput. Isersimaqataasup aappaa oqarpoq takusaqarsimanani aappaalu oqarluni toqusoq imminut kapisimasoq. Tamanna toqusut timaannik misissuisartunut saqqummiupparput imminullu toquttoqarsimasinnaanera taakku assortunngilaat. Tamanna qulakkeerniarlugu nakorsat eqqartuussivinnik siunnersuisartut isumasiorsimavagut taakkulu toqusut timaannik misissuisartut isumaqatigaat. Imminullu toqussimasinnaanera ilimanarsivoq imminnut illersoriarsimaneranut uppernarsaataasinnaasunik assammigut annersimanngimmat. Taamami pisoqarsimanissaa ilimanartorujussuugaluarpoq toqutsiniartumut akiuussimasuuguni. Ilisimasat tamakku tunngavigalugit Hans Peter Petersen iperarparput toqusoqarneralu imminut toqunnertut naatsorsuullugu, Claus Guldbrandtsen oqarpoq.