Toqutsineq pillugu suliami tarnikkut misissuineq: Unnerluutigineqartoq tarnikkut nappaateqanngilaq ulorianarporli
Sumiginnagaaneq. Meeraanerliorneq. Inuusuttuaraanermi politiinut aallaasersorneq. Danmarkimi inissinneqarneq. Meeqqat atuarfiannik naammassinninnginneq.
Angutip 28-nik ukiullip toqutsisimasutut toqungasullu timaanik ileqqussaanngitsumik iliuuseqarsimasutut unnerluutigineqartup inuunermi atugaasa ilaat Ilulissani Qaasuitsup Eqqartuussisoqarfiani saqqummiunneqaqqammertut taamaapput.
Taaguineq nanginneqarpoq:
-
Ilulissani toqutsillunilu agguisoqarnera
Angut toqutsisimasutut toqungasullu timaanut ileqqussaanngitsumik iliuuseqarsimasutut unnerluutigineqarpoq.
Taanna biilimik tillissimasututut biilernermullu allagartaqarani 2017-imi juunip aqqaneq-aappaani biilersimasutut aamma unnerluutigineqarpoq.
Angut Ilulissani 2020-mi februaarip 13-ianni peqqarniitsumik nakuusersimasututut aamma Nuummi pineqaatissinneqarsimasunut inissiisarfimmi 2022-mi januaarip tallimaani aamma peqqarniitsumik nakuusersimasututut aamma unnerluutigineqarpoq.
Toquneranut pissutaasoq suli ilisimaneqanngilaq. Tamanna toqungasup timaanik misissuisartut nassaarineqartut tunngavigalugit paasisinnaanngilaat.
Suliaq Qaasuitsup Eqqartuussisoqarfiani novembarip ulluisa 21-anni, 22-anni, 23-anni 24-anilu suliarineqarpoq.
Tarnimigut napparsimanngilaq – aamma piffissami pinerluffiusumi. Angut inuusuttoq ulorianarsinnaasoq. Allanut ulorianaateqarpoq. Eqqarsartaatsimigut kinguarsimalaartoq. Attaveqarniarnermigut ajornartorsiuteqangaatsiartoq. Eqqarsaqqaarani iliortartoq. Iliuutsimik paasinnittuaannanngitsoq. Imigassamik hashimillu atornerluisoq.
Inuunermi atugai tarnikkullu misissorneqarnera eqqartuussivimmi suliap aalajangiiffigineqarnissaanut saqqummiunneqartut kingulliit ilagaat.
Pisuunerminik nassuerutiginnerataartoq
Unnerluutigineqartup toqutsisutut toqungasullu timaanut iliuusissaanngitsumik iliuuseqarsimasutut unnerluutigineqarnini pinngitsuunerarfigeqqaarpai. Taanna eqqartuussinermi aamma oqaaseqarumanngilaq. Isummanili ullumi allanngorteriataarpaa – taassuma illersuisuata Finn Meinelip toqutsisimalluni toqungasullu timaanut iliuusissaanngitsumik iliuuseqarsimalluni angutip nassuerutigigaa oqaatigaa.
28-nik ukiulik suli oqaaseqarumanngilaq. Ulluni pingasuni eqqartuusvimmi suliarinninnermi nipaalluinnarluni assani paarlallugit nerrivimmi saaminiittup qaaniitsiinnarpai. Taassuma kiinaani nukinnguamik aalasoqanngingajavippoq.
AAMMA ATUARUK 28-nik ukiullip inuarsimanini agguisimaninilu nassuerutigigaa
Taassuma tunuani issiavinni marlunni nakkutilliisut marluk nakkutiginnillutik issiapput.
Angut angummik 24-nik ukiulimmik toqutsisimasutut unnerluutigineqarpoq. Unnerluussissut naapertorlugu tamanna unnerluutigineqartup Ilulissani inaani siorna septembarip ulluisa 29-anni pivoq. Taassuma toqungasup timaa aggorpaa timillu ilai eqqaaveqarfinnut, kingorna Ilulissani ikuallaaviliaanneqartunut, inissillugit.
Taanna angerlarsimaffimmi silataani siorna oktobarip arfineq-pingajuanni tigusaavoq, tamatumalu kingorna tigummigallarneqaannavilluni.
Ukiuni qulingiluani imaluunniit piffissami killiligaanngitsumi paarineqassasoq
Unnerluussisussaatitaasup, Marutha Thayapharanip piffissamik killiligaanngitsumik paarinninnissaq piumasaqaatigaa.
- Peqqarniitsoq, ajorluinnartoq naakkittaatsuliortorlu, unnerluussisussaatitaasoq eqqartuussivimmi suliap naammassinissaanut oqarpoq.
Illersuisup, Finn Meinelip, ukiunik qulingiluanik pineqaatissinneqarnissaa tunngavilersorpaa. Taassuma unnerluutigineqartup imminut illersorluni iliuuseqarsimanera innersuussutigaa, pissutigalugu pinerluuteqarfigineqartup savik unnerluutigineqartup qungasianut tutsissimammagu.
- Soorunami tamatuma kingorna qisuariaatit pillugit eqqartuussuteqassaaq. Kisianni uivernermi qisuariaateqartoqarneranut toqutaasullu saassussineranut tunngalluni.
AAMMA ATUARUK Toqutsineq pillugu eqqartuussineq: Ilisimannittup unnerluutigineqartoq pinerliffigineqartorlu imeqatigisimagai
Eqqartuussisup unnerluutigineqartoq ilanngutassaqarnersoq aperaa. Taanna malugisassaanngitsumik niaqquminik ileqimisaarpoq.
Eqqartuussivimmi suliaq ualimut imaluunniit aqagu siusissukkut inernilerneqassaaq.