Toqusut timaannik angallassinermut nutaanik maleruagassaqalersoq
Toqusut illerfimmut zinkimik sanaamut akisullunilu oqimaatsumut, angallanneqarnermilu akisuumut ikineqarlutik maanna angallanneqartarput. Zinkimulli sanaamut taarsiullugu annoraasiassat siunertamut taassumunnga immikkut sanaat atorneqarsinnaalerput.
Annoraasiassat atorneqartut avatangiisinut pitsaanerupput, angallanneqarnerallu akikinnerulluni. Nunatsinni nakorsaaneq Henrik L. Hansen tusagassiutinut taama nalunaaruteqarpoq.
Annoraasiassat toqusunik angallassinissamut IATA-mit, tassa International Air Transportation Associationimit, silanakkut assartuussinermi nunarsuaq tamakkerlugu malittarisassanik suliaqarsimasunit akuerisaapput.
Nunatsinni Nakorsaaneqarfik, Kalaallit Nunaanni Politimesteri Peqqissutsimullu Naalakkersuisoqarfik tamanna tunngavigalugu isumasioqatigalugit maleruagassat pisoqqat illerfimmi zinkimik sanaami roqusunik angallassisarnerup allanngortinneqarnissaanik aalajangiivoq.
Toqusunut timaannik angallassinissanik isumaginninnermi piumasaqaatit timmisartortitseqatigiiffimmut umiarsuaatileqatigiiffimmulluunniit toqusup timaanik angallassisussamut maanna isumaqatigiissutaassapput.
Toqusut timaannik angallassisarnermi malittarisassat nutaat Nunatsinni Nakorsaanerup nittartagaani nun.gl-imi atuarneqarsinnaapput.