Toqusup arsai tammarmata suli ilisisoqanngilaq
Siverth Petersen, Siivaleeraq, 50-nik ukioqarluni Københavnemi maajip qulingata missaani toquvoq. Ilaqutaasa nunatsinni ilisaanissaa kissaatigaat, kisianni tassa qaammatit maannakkut arfinilinngulersut suli ilisaanngilaq. Københavnimi arsai sumiinnersut ilisimaneqanngilaq.
Siivaleeraq Siverth Petersen Maniitsormiuuvoq, Royal Greenlandip kilisaataattaanni ukiorpassuarni inuttaalluni. Kilisaammit sulinngiffeqarnermini maajip qaammataani Købehavnimiippoq, Københavnimiitillunili uummamminik unittoorluni toquvoq.
Siivaleeqqap toqunera pillugu ilaqutai kalerinneqarput, taakkualu kissaatigaat nunatsinni ilisaassasoq. Qitornaasa Nuummiittut kissaataat malillugu Nuummi ilisaanissaa kissaatigineqarpoq.
Kisianni tassa maannakkut qaammatit tallimat sinnerlugit qaangiupput Siivaleeraq toqummalli, arsaalu suli nunatsinnukaanneqanngillat.
Arsai sumiinnersut maannakkut ilisimaneqanngilaq. Ilaqutaasut tupinnanngitsumik aliasupput, qatanngutertik suli ilisaanngimmat.
Siivaleeqqap aleqaa Mathilde Berthelsen radioaviiisimi immiullugu apersorusussimagaluarparput, misigissutsimigulli attortisimavallaarnini pillugu immiutsilluni apersorneqarusunnani.
Siivaleeqqap arsaasa nunatsikaanneqarnissaat sulisisutsisuata Royal Greenlandip ilaqutaasunut neriorsuutigisimavaa.
Københavnemi oqaluffik Siivaleeqqap arsaanik isumaginnittoq Vor Frelsers Kirke, Royal Greenlandimit attavigineqarpoq, Siivaleeqqap arsaasa nunatsinnukaannissaat pillugu. Royal Greenland oqaluffimmut Vor Frelsers Kirkemut 22. august saaffiginippoq, Siivaleeqqap arsaasa nunatsinnukaarneqarnissaat pillugu.
Manna tikillugu oqaluffik saaffigineqartoq akissuteqanngilaq aamma suliffeqarfissuaq Royal Greenland qanoq iliuuseqaqqinngilaq.
Siivaleeqqap aleqaanut Mathilde Berthelsenimut aliasunneq angivoq qatanngummi asasami toquneranit piffissaq sivitsormat suli ilisaanani.
Mathilde Berthelsen imminut pisuutittutut misigisimavoq, maanna qatanngummi, toquneranit piffissaq sivitsormat ilisaanani, arsaasalu sumiinnerisa ilisimaneqannginnerat aamma pissutigalugu.
Toqunerata kingorna ikuallannagu ilisaasimasuuppat maannakkut aliasunnerput taama angitisimassanngikkaluarpoq, Mathilde Berthelsen radioaviisimut oqarpoq.
