VIDEO Toquarartaattarneq politiit unitseqqugaat

Bodil Abiassen kammalaatinilu uloriarnartumik pinnguaateqartarsimagaluarput.

- Ilaasa qungasikkut tigusarpaat, ilaasa uummatikkut naqittarpaat. Taava silaaruttarput, ilaat sinnattuaqisarput, Bodil Abiassen oqarpoq.

Ulorianartorli paasigamikku unitsippaat. Toquarartaattartunilli nalunngisarpassuaqarpoq:

- Isiginnaartarnikuuvunga kammalaatikka toquarartaatarnikuugamik isiginnaartarpakka, Bodil Abiassen oqarpoq.

Inuusuttut pissanganiutitut atugaat toqumik kinguneqarsinnaasoq, ulluni makkuni politiinit aamma maluginiarneqarpoq.

-Tassa piffissami kingullermi tusartaleratsigu taanna pinnguaat sakkortooq. Imminnut toquarartaallutik, toqqusassiilluni anersaartitsineq sapilerluni sivisuumik uninngatitsisarneq atuuppallaalersimasoq inuusuttuaqqani, Bent Ole Kleist, Kujataani Politiit pisortaat oqarpoq.

Pinnguaatissaanngilaq

- Ippassaq napparsimmaveqarfimmit kalerrinneqaratta inuusuttuaraq 16-inik ukiulik nakorsiartarfimmut isersimasoq, siutimininngaaniillu aamma aasimalluni, taamak toqqusassineqarnermi kingorna, Bent Ole Kleist oqarpoq.

Taammammat mianersooqusinissamut piffissanngorpoq.

- Ajutoortoqartinnagu kikkunnut tamanut mianersuutigeqqulaaraluaripput taamannak pinnguarneq aamma toqumik kinguneqariataarsinnaammat, tamannalu pinngitsoorusukkaluaqigatsigu, Bent Ole Kleist oqarpoq.

Politiillu neriupput ajornerusumik kinguneqassanngitsoq.

- Avataaniit tusartarpagut atuarfiup eqqaani inuusuttut akornanni taamak pinnguartoqartartoq. Saaffiginnittoqarneq ajorpoq. Aatsaat ippassaq taamak sukuumiitsigisumik napparsimaveqarfimmiit saaffigineqaratta isumaqarpugut qisuariartariaqalerluta, Bent Ole Kleist naggasiilluni taama oqarpoq.