Toqu pillugu Sisimiuni Nuummilu meeqqanut isiginnaartitsineq
Hr. Muffin tassaavoq uumasoq marsvin sivisuumik nuannersumillu inooreerluni inuunermit qimaguttussanngortoq. Taamaasilluni toqu meeqqanut paasiuminarninngorpoq, inuusat atorlugit isiginnaartitsisartut takutitsimmata. Hr. Muffin nunarsuup ilarujussuani takutinneqartareersoq maanna Nunatsinni takutinneqartussanngorpoq.
- Isiginnaartitsinerput atorlugu oqaluuserisaq eqqartoruminaatsinneqartartoq tikipparput. Takutipparput toqu ajortuinnaanngitsoq aammalu toqu tassaasinnaasoq inuunerup sivisuup pitsaasullu naggataa. Taanna takutikkaagatsigu qisuariaatit assigiinneq ajorput. Ilaatigut isiginnaartorpassuit qiasarput ilaatigulli allaanerusumik tiguneqartarluni, Claus Mandøe isiginnaagassiamik ullumi Sisimiuni takutinneqartussamik suliarinnittoq oqarpoq.
Sapaatip akunnera tulleq Katuami isiginnaagassiap takutinneqarnissaanut sulissutiginnittq pisussanillu aaqqissuussisartoq Susanne Andreassen qilanaarpoq illoqarfiit annersaanni meeqqanut angajoqqaanullu takutinneqarnissaanut.
- Isiginnaagassiaq nammineerlunga takoreerpara assullu Claus Mandøe nersualaarpara inuusanik atuillaqqinnera pillugu. Soorlumi tassa inuusat uumassusillit isiginnaartullu nipaarulluinnarlutik Mr. Muffin-ip silarsuanut isertarput. Isiginnaagassiami isiginnaartitsisut meeqqat paasisinnaasaannik saqqummiillaqqipput oqaluuserisarlu pillugu nuannersunik misigisaqartitsisarlutik allat alianartutut misigisaraat, Susanne Andreassen oqarpoq neriuutiginerarlugulu Nuummi isiginnaariaqarluarumaartoq.
Isiginnaartut qisuariaataat assigiinngissinnaasarput nunarsuarmi sumi takutinneqarnera apeqqutaalluni. Sumiiffiit ilaanni angajoqqaat kamaatigisarpaat allanili oqaluuserisap samminerulernissaanut aallarniutaasarpoq toqumi uaneerarsuarmiissinnaasarmat.
- Isiginnaartitsinerup kingorna oqaloqateqaraangatta ilaatigut uumasuutit oqaluuserineqartarput ilaatigullu aanaakkut qimagussimanerat oqaluuserineqartarluni, isiginnaartitsissusiarpullumi atorlugu meeqqat toqu ilisimasaqarfiginerulersimavaat. Uanimi isiginnaartut periarfissippagut toqup oqaluuserinissaanut taamaasilluni paqumigineqarluni nipangiutiinnartussaajunnaarlugu, aatsaat ilaquttanik toqusoornikkut oqaluuserineqartussatut, Claus Mandøe ullumi kingusinnerusukkut Sisimiuni isiginnaartitsisussaq oqarpoq.
Ukiorpassuarni ajornakusoortinneqartarsimavoq alianartut pillugit meeqqat oqaloqatiginissaat ukiunili kingullerni Kalaallit Nunaanni ammaffigineqarnerulerpoq pisut eqqarsariaallannartut soorlu persuttaanerit, meeqqanik atornerluinnerit toqullu eqqartornissaat. Mr. Muffin-ilu atorlugu ammaassisoqarpoq meeqqat peqatigalugit oqaluuserinissaanut.
- Uanga isumaga malillugu kukkuneruvoq oqaluuserisassanut taamatut ittunut meeqqat eqqartuisinnaversaarneqartarnerat. Nalunngikkunikkumi toqu qanoq isumaqartoq immaqa artorsarpallaassanngillat aanaa imaluunnit atuffassisinnaajunnaarpata. Teater Reflektion toqu pillugu nipangiussinianngilaq, aamma qularutiginngilara Kalaallit Nunaanni isiginnaagassiaq tigulluarneqarumaartoq aallarniutaallunilu toqup eqqissisimanerusumik isigilernissaanut, Susanne Andreassen oqarpoq.
