Kommuneqarfik Sermersuumi meeqqat ulloq unnuarlu angerlarsimaffimmut pinasuartumik inissinneqartut takornarialerinermik siornatigut sulialinnit Nuuk Outdoorimit, manna Isunnguamit, siorna paarineqartut, ukiorlu manna suli paarineqartut KNR-ip nutaarsiassaqartitsiviani oqaluttuarinikuuagut.

Nuuk Outdoorimi perorsaasut ilinniarsimasut amigaatigineqartut piginnittoq, Kennerth Thomsen nammineerluni nassueruteqarnikuuvoq.

Nuummi meeqqat ulloq unnuarlu angerlarsimaffianni imminut pigisumi Amarok-mi pisortaq, Inunnguaq Fleischer tamanna pillugu attavigaarput. Taassuma nunatsinni meeqqat sumiginnakkat ukiut qulit sinnerlugit sulittareerpai. Meeqqat pinasuartumik inissitat sunik pisariaqartitsisarnersut taanna aperaarput.

Taassuma Nuuk Outdoorimut tunngasoq imaluunniit Kommuneqarfik Sermersuup meeqqanik allamut inissiisarnera oqaaseqarfigerusunngilai, meeqqalli angerlarsimaffiup avataanut inissinneqarsinneqartartut ataatsimut isigalugu sunik pisariaqartitsisarnersut ilisimaarilluarpaa.

- Pingaarnerpaajuvoq tassa sulisut. Sulisut pitsaasut inissaqartitsisut, tassunga pigunik angerlarsimaffinnut angerlarsimaffippalaartunut pinissaat taamaalillutik aamma meeqqat toqqissisinnaaniassammata, taava aatsaat sullinneq aallartinneqarsinnaavoq.

taanna oqarpoq, nangillunilu:

- Kisianni aamma ajoraluartumik pisariaqarsinnaasarpoq meeqqat aqqusaagai sakkortuallaarsimappata immaqaluunniit ullutsinni meeqqat arlallit aanngajaarniutinik atornerluisooreerlutik takkuttaramik, tamakkullu unitsinniarutsigit illoqarfimmiit peerseqqaartariaqartarpagut.

Nakuuserneq, aanngajaarniutit imminullu toqunneq

Meeqqat nunatsinni sumiginnagaanerpaat atukkamikkut artorsaateqartut toqqissinissaminnik ajornartorsiortanerat Inunnguaq Fleischerip paasilluarsinnaavaa. Nuuk Outdoorip aamma nammineerluni meeqqat iliuuseqarfiginissaat imaannaanngissinnaasarpoq:

-Ajoralurtumik illoqarfimmi suliffitsinnilu aqqusaartarpagut meeqqqat aanngajaarniutinik atuisut, atornerluisut Nuummi illoqarfinni persuttaanerit aamma amerliartuinnarput taakkulu aamma sakkortusioartuinnarlutik, allaat ukioq kingulleq aamma tusartalerpagut inuusuttuaqqat iliuusissaarullutik imminortut.

Meeqqat angerlarsimaffiup avataanut inissinneqaraangamik inuunerminnik imaanaannginnerpaamik aqqusaagaqareerlutik, nuutitaanerpassuit aqqusaaqqaarlugit ulloq unnuarlu angerlarsimaffimmut inissinneqartarnerat toqqissiviiffiup aamma aallaavigisaraa, Inunnguaq Fleischer isumaqarpoq.

- Meeqqat uagutsinut ulloq unnuarlu angerlasimaffimmut inissinneqartartut, tigusarpagut inuunerminni sakkortunerpaamik nalaataqaqqammersimanerata nalaanni uagutsinnut pisarput.

- Taamaattumik arlaatigut sakkortuunik nalaataqarsimapput, aliasupput tatigisaqanngillat, ajortorujussuarmik misigisaqarsinnaapput taamaattumik sulisoqartariaqarput pitsaasut, tamakkuninngalu inissaqartitsisut.

Toqqissisimanartumik sinaakkusiisoqarli

Meeqqat taamatut aqqusaagaqarsimasut ataavartumik namminersorlutik oqartussaniit kommunimiillu aalajaatsunillu tunngavilinnik sinaakkutilinnik iliuuseqarfigineqarissaa pisariaqartoq, Inunnguaq Fleischer isumaqarpoq.

- Uagut siunnersuutiginikuuarput meeqqat ulloq unnuarlu angerlarsimaffinnut inissinneqassappata, aallaqqaammut ulloq unnuarlu angerlarsimaffimmut inissinneqaqqaarpata taamaalillutik toqqissineq peqqaarniassammasuk.

- Taamaalillutillu meeqqat sungiusarneqarsinnaapput, angajoqqaaminnut angerlaqqissanngippata taava angajoqqaarsianut nuunnissaannut piareersarlugit, aamma angajoqqaarsiassaat piareersarlugit meeqqap tiguinnissaanut, arriitsumik eqqissillutik imminut ilinniarlutik, qisuariaatigisartagaat ilinniartillugit. Taavalu angajoqqaarsiat qanimut suleqatigalugit qanoruna una meeraq ikiorsinnaagipput ikioqatigiilluta. Taamaaliornertigut inisseeqattaarnerit immaqa ikilissagaluartut takorloorsinnaavarput.