Toqqaannartumik nutserisoqartalernissaa Folketingip atuutilersikkaa
- Nuannaarutigivara Folketingip siulittaasoqarfiata kalaallisuumiit danskisuumut toqqaannartumik oqalutseqarsinnaaneq novembarip 26-ani annertusisamik ministeriunermut apeqqarissaarnissami misilinnialermassuk.
Folketingimi akunnermi apeqqarissaartoqarnerani toqqaannartumik oqalutseqarnissaata misilerarneqarnissaa Folketingimi aalajangerneqareersorlu, Siumut sinnerlugu Folketingimut ilaasortaq Aki-Matilda Høegh-Dam tusagassiorfinnut nalunaarummi taama allappoq.
Folketingip siulittaasoqarfiata aalajangigarigaa, Folketingip tusagassiorfinnut nalunaarutaani allassimavoq.
Aki-Matilda Høegh-Dam, ministeriunermut akunnermi apeqqarissaartoqarnerani kalaallisuinnaq oqalunniarlunilu apeqquteqarniarmat taama aalajangertoqarpoq:
- Aki-Matilda Høegh-Damip kissaataata akuerineqarnissaanut piffissakilliortoqarnera pissutaalluni akuersinissaanut aalajangerpugut, Folketingip siulittaasua Søren Gade tusagassiorfinnut nalunaarummi allappoq.
- Misileraasoqarnera misilittagaqalerfigissavarput, toqqaannartumillu nutserisoqartalernissaanut siulittaasoqarfiup tunngaviusumik aalajangernissaanut tamanna tunngaviliissaaq, taanna oqarpoq.
Alloriarneq pingaarutilik
Folketingimi nutserisoqarsinnaanera Folketingimi siorna oktobarimi periarfissaalerpoq.
Oqalugiartup oqalugiaatini kingorna qallunaatuunngortippagu kalaallisut Savalimmiormiusullu Folketingimi oqaluttoqarsinnaalersoq isumaqatigiissummi takuneqarsinnaavoq. Folketingimi ilaasortat Atlantikup avannaaneersut tamanna pillugu qaammammut 67.000 koruunisisarnissaat aalajangerneqarpoq.
Taamatulli aaqqiisoqarnissaa akuersaarsimanagu Aki-Matild Høegh-Damip oqaatigaa.
- Aaqqiissutip uuma ajunngitsuunera oqaatiginikuunngisaannarpara. Folketingip siulittaasoqarfia peqatigalugit isummakka saqqummiunikuunngilakka. Taamaammat taama oqarnera ilumuunngilaq, Aki-Matilda Høegh-Dam KNR-imut siorna oktobarimi oqarpoq.
Folketingimi toqqaannartumik nutserisoqarsinnaalernissaanut ammalluni, Søren Gadep kingorna oqaatiginikuuaa.
- Toqqaannartumik nutserisoqarsinnaassappat taanna soorunami periarfissaasinnaassaaq, Søren Gade oktobarimi oqarpoq.
Toqqaannartumillu nutserisoqarsinnaanera maanna tassa misilerarneqalerpoq. Aalajangerneq taanna Aki-Matilda Høegh-Damip nuannaarutigaa:
- Tamanna Folketingimi qinersiviit tamakkerlugit peqataasinnaanerannik periarfissiineq alloriarneruvoq pingaarutilik, tassuunalu aamma Kunngeqarfimmi pisortatigoortumik oqaatsit tamaasa atorneqarsinnaalersillugit, taanna tusagassiorfinnut nalunaarummi allappoq.
- Uannut oqaatsit pineqaannanngillat, aammali ataqqinninneq inuiaqatigiinnullu uagutsinnut kunngeqarfimmi naligiinnerulernermut alloriarneq, Aki-Matilda Høegh-Dam allappoq.
