Tom Hagenip nuliaminik nassaarinnittumut millionilikkaanik akissarsititsinissani neriorsuutigigaa
Norskip milliardilikkuutaanik aningaasaatilissuup, Tom Hagenip, nuliami Anne-Elisabeth Hagenip nassaarinissaanut paasisussaateqarsinnaasunut norskit aningaasaannik ti millioninik - danskit aningaasaanngorlugit syv millionit koruuninik - akissarsititsinissani neriorsuutigaa.
Norskit nutaarsiassaqartitsiviat TV2 taama allappoq.
Tom Hagen nuliaminik Anne-Elisabeth Hagenimik toqutseqataasimasutut pasineqarpoq. Nulia Oslop avataatungaaniittumi Lørenskogimi angerlarsimaffimmini 2018-imi oktobarip 31-ani periarfeerunneqarpoq.
- Anne-Elisabeth Hagenip nassaarineqanngitsoornissaa Tom Hagenip aarleqqutigaa. Taamaammat susoqarsimanersoq paasiniarniarlugu taama aalajangerpugut, Tom Hagenip illersuisua Svein Holden norskit nutaarsiassaqartitsiviannut TV2-mut oqarpoq.
AAMMA ATUARUK Norgemi tusagassiorfik: Tom Hagen toqutsisutut pasisaasumik naapitsisaqattaartoq
Tom Hagen nuliami periarfeerunneranut attuumassuteqannginnerarpoq. Taakkulu qitornaasa arnartik aallarussaasismasoq upperigitsik siusinnerusukkut nalunaarutigaat.
Norskit politiivisa aningaasaatilissuup nulia toqutaasimassangatippaat. Tom Hagen poliinit maajip ulluisa arfineq-pingajuanni tigummigallagaajunnaarpoq. Kisianni toqutsisimasutut toqutseqataasimasutulluunniit suli unnerluussaalluni.
Anne-Elisabeth Hagen pillugu suliaq aallarussisoqarsimasutut sivisuumik misissuiffigineqarpoq. Anne-Elisabeth Hagenilli toqutaasimanissaa maanna ilimagineqarluinnarluni.
Angut 30-t missaanni ukiulik kryptovalutamik immikkut ilisimasalittut taagorneqartoq sakkortuumik kiffaanngissusiiaasimasutut suliamut atatillugu pasineqarpoq.