Akitsuuserisut talittarfimmi 8 miliuunit missaat qerisunut puussiani nassaaraat
Aningaasanik miliuuni koruuninik aningaasanngukkanik nassaarneq qaqutigoortuuvoq, Danmarkimi ilanngaaserisut misissuisartut oktobarip qeqqata missaani aningaasarpassuarnik nassaaqqammerput.
Misissuisartut qerisut akornanni aningaasat 7,7 millioni koruunit nassaaraat, aningaasallu taakku qerisutut poortorlugit nassiunneqarsimapput.
Ilanngaaserisut Aqutsisoqarfiata pingasunngormat pisimasoq tusagassiuutitigut nalunaarutigaa.
Foto: Toldstyrelsen.
Palitsit arlallit qerisut akornanniittut immikkut misissussallugit Grønlandshavnimi Aalborgimiittumi immikkoortinneqarsimapput. Misissuisut pappiliaataat naapertorlugit nassiussat qerisutut nalinginnaasutut nassiunneqarsimapput, misissorluarneqarmatali paasineqarpoq aningaasarpassuit millioni koruunit qerisut akornannut toqqorluarlugit nassiunneqarsimasut.
Ilanngaaserisut nakkutilliinermut pisortaata, Michael Lund-ip, akitsuuserisut ”pitsaalluinnartumik nakkutilliisimanerannik” nersualaarpai.
- Qerisut akornannut aningaasat toqqorluarneqarsimapput, qaava tungaani nassaassaqanngilaq skannerummilli misissorluarneqarmata aammalu qimmit ikiorsiullugit misissuisoqarnerani aningaasarpassuit nassaarineqarput, taamaalimmallu politiit kalerrinneqarput, Danmarkimi misissuisut pisortaat Michael Lund taama ilisimatitsivoq.
Misissuinermi pisortaqarfiup aningaasat suminngaanneersuuneri allassimanngilaat, paasissutissiissutigaalli suliaq Kalaallit Nunaata politiivinut ingerlateqqissimagitsik.
8 miliuuningajaat ilanngaaserisunut aningaasat amerlaqaat, taakkua ilaatigut Danmark-ip killeqarfiitigoortunik nakkutilliisuupput.
