Tjele Efterskole pilerigineqarneruvoq
Tjele Efterskole ukiuni arlalinni kalaallinik atuartuuteqarsimavoq, siornatigullu marluk arfinillillu akornanniiginnartarlutik. Kalaallit atuartuuutigineqartut siorna quliupput. Ukiormannalu 25-t atuartuutigineqarput, aappaagulu utaqqisut allattorsimaffiinik pilersitsisoqartariaqassagunarpoq, kalaallit atuarusullutik soqutiginnittut 30-t sinnermatigik.
Atuarfiup BMX-inik sammisaqarnera ilaatigut kalaallinit atuarusuttut amerlasuut soqutiginninnerannik pissuteqarpoq – pingaartumik Sisimiormiut BMX-ermik soqutiginnittupilussuupput.
BMX-ertartut ilaat tassaavoq Karl Geisler Clasen Nuummeersoq:
- BMX-erneq pingaarteqaara. Inuit ilaasa pinnguarnertut isigisarpaat, tamannali kukkuneruvoq. Uagut nuannarisupilussuuarput. Sinnattorpununa, oqarpoq.
Efterskolemi ilinniartitsisut naapertorlugit kalaallit BMX-ertartut sapiinnerupput. Taamaammat aamma atuarfimmi pikkorinnersaapput, aammali napparsimmaviliakularnerusarnerinik kinguneqartarpoq. Ilami ima napparsimmaviliakulatigaat, allaat Falckip atuarfiup sullissinermik pisartagaqarneranut akiliummik qaffaasimalluni.
- Naak isumannaallisaatissatut atortoqarnissaannut sukannersunik malittarisassaqartitsigaluarluta ajoqusikulasupilussuupput. BMX-imik timersuummi killissanik ujaasisupilussuusarput, taamaammat aamma annersinnaasarput, Tommy Jørgensen, atuarfimmi ilinniartitsisoq oqaluttuarpoq.
Atuarfimmi sammineqartut allat ilagaat nerrivimmi arsaararneq, tassanilu Nunatsinni nerrivimmi arsaarartartut pikkorinnersaasa ilaat atuartuupput. Taakku ilagaat Aka Mark Møller.
- Atuakkerinissara maannakkorpiaq eqiagaara, kisianni nerrivimmi arsaararneq aalluttupilussuuara sungiusangaatsiartarlungalu. Unammisarnera nuannarisupilussuuara, aamma ajortut tamaasa eqqarsaatigiunnaartarakkit, oqarpoq.
Nerrivimmi arsaararluni nunatsinni pissartanngorniunnerni, poorskikkunni ingerlanneqartuni, Tjele Efterskolemi atuartut 15-inik medaaliannapput. Aammattaaq Danmarkimi unammisaqattaarnerni angusarissaartuupput. Nukannguaq Søholm Danmarkimi arnat nerrivimmi arsaarartattut U21-t pikkorinnersaanni normu 11-nngorpoq.
- Ingerlalluaqaat. Kalaallit nunanut allanut unammisartui efterskolemi atuartuusimapput, ilarpassuilu maani atuartuusimallutik. Aamma ukiormanna atuartuuteqarpugut arnani nunanut allanut unammisartunngorsimasimasumik, taamaammat maanga Danmarkiliartitsisarneq pitsaasuuvoq misilittagaqalersitsisarlunilu, Tommy Jørgensen oqarpoq, taanna atuarfimmi ilinniartitsisuunermi saniatigut aamma Kalaallit Nunaanni nerrivimmi arsaarartartut nunanut allanut unammisartuinut sungiusaasuuvoq.
Tjele Efterskolep atuartunik kalaallinik taama amerlatigusunik atuartuuteqartalernera qanga pisarsimasunik allanngortitsiniarnermut atassuteqarpoq. Atuartut atuaqatiminnut danskinut akulerulluarnissaat anguniarlugu atuarfimmi kalaallisut oqaluttarnissaat inerteqqutigineqarsimagaluarpoq, maannali tamanna allanngortinneqarsimavoq.
- Efterskolemi atuartut amerlanerit danskisut ilinniarluarnerusarnerat takusalerparput. Toqqissisimanerat tamatumunnga peqqutaanasoraara, toqqissisimagaannimi iliuuseqarnissamut sapiissuseqarnerusoqartarpoq, Tommy Jørgensen oqarpoq.
Tjele Efterskole nutaaliorluni atuartunik kalaallinik tapersuisussamik kalaallisut oqaasilimmik atorfinitsitsisimavoq. Peqatigisaanik aamma atuartut oqaatsinik ilinniartinneqarnerat annertusarneqarsimavoq.
