Tivolimit Rockimik tusarnaariarneq

Kalaallit Nunaata Tivolimiinnera augustip aallaqqaataani pingasunngorpat tulliani matuneqariarpat nuannanneq nangillugu Nordatlantens Bryggemi Rockimik tusarnaartitsisoqassaaq. Tassalu Kalaallit rockimik nipilersortartuit nuannarineqarluartut Zikaza ullaap tungaanut tusarnaartitsissammata.
Allattoq Peter Troelsen, Salome Hansen
juulip 24-at 2012 10:24

Nipilersoqatigiit 1980-kkunni saqqummeramilli nuannarineqarluartut Nordatlantes Bryggemi tusarnaartitsinissaminnut akuersisimapput, tassalu maanna Kalaallit Danskillu Tivolimi kalaallit ulloqarneri naammasseriarpata nipilersukkanik tusaamaneqarluartunik tusarnaariarsinnaanngorput.

-Ukiuni arlalinni pilersaarutaareersimagaluarpoq, aningaasaqarniarnerpulli uniffiusarsimavoq. Ukioq mannali tamanna piviusunngortsissinnaanngorparput, nuannaarutigeqaaralu Siiva Fleisher Zikazaminngaanneersoq piffissaq sivisooq utaqqereerluni maanna ilanilu tusarnaartitsisussanngornerat. Tusarnaartitsinissami inuit 400-t inissaqarput, tamatumanilu neriuutigaarput upperalugulu inissat tamakkerlugit tusarnaariartoqarumaartoq. Tassalu Kalaallit rockiannik nuannerluinnartumik tusarnaariartut siulliit 400-t kisimik inissaqarput, Edmund Sofus Jakobsen Nordatlantens Bryggemi tusarnaartitsinissami aaqqissuisut aqutsisuat taama oqaluttuarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq